Гиччипавланы сюювюн къазангъан
Сентябр айны 27-нде Россияда тарбиялавчуну ва школа чагъына етишмеген яшлар сакъланагъан къурумланы къуллукъчуларыны гюню белгилене. Гьалиги заман кёбюсю ата-аналар яшларын яшлар бавлагъа бермеге сюе. Неге тюгюл де яшлар бавларында гиччипавлар башгъа яшлар булан къатнашмагъа, уллу группаларда язмагъа, хабар тизмеге, бийимеге, ойлашмагъа уьйрене. Демек школагъа гьазирлене, ата-ана учун хыйлы кёмек бола.
Гиччипавланы школагъа уьйретмек учун тарбиялавчулар кёп загьмат тёкмеге гереги ачыкъ. Ишине берилип, яшланы да сююп ишлейген тарбиялавчулар районну яшлар бавларында кёп бар. Шолай тарбиялавчу деп биз Къарабудагъгентдеги 2 номерли «Юлдуз» деген яшлар бавуну тарбиялавчусу Багъатырова Нюрюпат Исрапиловнагъа да айтмагъа болабыз.
Нюрюпат Багъатырова 1966-нчы йыл январ айны 20-нда Къарабудагъгент юртда тувгъан.
Къарабудагъгент 1 номерли орта школаны охуп битдирген сонг, ол Буйнакскдеги педагоглар гьазирлейген училищеге башлапгъы класланы муаллимлерин гьазирлейген бёлюгюне охума тюшген ва 1988-нчи йыл ону охуп битдирген.
Н.Багъатырова 1988-нчи йылдан башлап «Юлдуз» яшлар бавунда тарбиялавчу болуп ишлей. Ол – оьр категориялы педагог. Яхшы иши ва гьаракаты саялы, яшлар бавуну администрациясыны, район билим берив управлениени ягъындан кёп керенлер грамоталар ва Баракалла кагъызлар булан тергелген.
2010-нчу йыл ол «Почётный работник общего образования РФ» деген атгъа ес болгъан.
Яшлар бавунда ишлейген йылларыны ичинде Н.Багъатырова оьзюню бажарывлу ва билимли педагог гьисапда гёрсетген, тарбиялав ишни бек усталыкъ булан, яшлагъа пайдалы къайдада юрютегенин айланадагъылагъа аян этген. Оьзюню ишинде Нюрюпат Багъатырова янгы технологияланы генг кюйде къоллай. Гиччипавлагъа бек тергевлю, рагьмулу, йымышакъ тарбиялавчуну яшлар кёп сюе, ондан тартынмай, огъар багъып талпына. Гиччипавланы тарбиялав, олагъа билим берив ишни Нюрюпат Багьатырова ата-ана булан тыгъыс байлавлукъда юрюте, олагъа насигьатлар бере. Олар буса оьзлени «тарбиялавчусуна» кёп сююп тынглай. Гьар гюнлюк ишинде Н. Багъатырова адатланмагъан, тюрлю къайдаланы къоллап, дарсларын къужурлу этмеге, гиччипавланы тергевюн артдырма гьаракат эте.
Олай да, ол гьар даим оьзюню уьстюнде де ишлеме, демек, билимлерин камиллешдирме къаст эте.
Нюрюпат Багъатырова оьзюню бек яратывчу, сиптечилик касбучу гьисапда гёрсете. Ол ишине жаваплы, намуслу янашыву булан коллективни арасында абур къазангъан, яшланы сюювюне, ата-аналаны гьюрметине ес болгъан.
Биз ону Тарбиялавчуну гюню булан къутлай туруп, гележекде уллу уьстюнлюклер ва савлукъ ёрайбыз.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
