«Россияны уьстюнде турналар»
Дагъыстан АССР къурулгъанлы 100 йыл битгенлигине багъышланып оьтгерилеген чараланы узата туруп, сентябр айны 8-нде Магьачкъала шагьардагъы «Дагестан» деген Маданият къалада «Журавли над Россией» деген гьар йыл юрюлеген патриот йырланы фестивалы оьтгерилди. Фестиваль ДР-ни маданият министерлигини ва Халкъ яратывчулугъуну республика Уьюню сиптечилиги булан гьазирленип оьтдю.
Белгили кюйде, Расул Гьамзатовну «Турналар» деген шиърусун сав дюньяда эшитмеген адам кёп аз бардыр…
Шо шиърудан сонг турналар Уллу Ватан давда жан бергенлени эсделигини, дюньяда парахатлыкъны, халкъланы бирлешдиреген белгиси болуп токътагъан. Гьар йыл оьтгерилеген «Журавли над Россией» деген фестиваль халкъыбызны игитликлерини, къоччакълыкъларыны эсделигин, элине, ватанына, оьз адатларына бакъгъан сюювюн исбатлай.
Яратывчулукъ янашывсуз оьсюп гелеген яшёрюмлерибизни оьз тарихибизге, маданиятыбызгъа гьюрмет этмеге, сюймеге уьйретмеге бажарылмажагъы ачыкъ. Шо гюн оьтгерилген фестиваль, оьзге заманларда йимик, кёп пагьмулуланы жыйды, олар оьзлени чыгъышларында Ватангъа, ону тарихине, маданиятына бакъгъан сюювюн бек арив, яратывчу усталыкъ булан аян этмеге бажарды.
Фестивальда Къарабудагъгент районну «Къарабудагъгент» деген Агъай Къаплановну атындагъы эргишилени хору да ортакъчылыкъ этди. Олар Магьаммат Атабаевни сёзлерине къурулгъан «Къумукъ тюзлер» деген йырны йырлады.
Республикабызны халкъларыны тиллеринде йырланагъан патриот йырлар бизин регионну кёп тюрлю миллетлери болса да, олар барысы да бир-бири булан ювукълукъда, дослукъда яшайгъанын, бир-бирине якълавлу экенин ачыкъ этди. «Журавли над Россией» деген Акъ турналаны гюнюне багъышлангъан республика фестиваль 1986-нчы йылда Расул Гьамзатовну сиптечилиги булан оьтгерилмеге башлангъан.
Чара ДР-ни Роспотребнадзор къурумуну тапшурувлары яшавгъа чыгъара туруп оьтгерилди.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
