Меню
16+

Сетевое издание "Району яшаву"  «Будни района»

17.09.2021 09:31 Пятница
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Къыставуллу гюнлер

Автор: Шихав Къайирбеков

Гюзню баш айы (къочкъар ай) юртлу загьматчылар учун лап къыставуллу вакъти. Авлакъчылар гезикли авлакъ ишлени заманында къурумлу ва сан янлы кюйде оьтгерме гьаракат этелер. Бавчуларыбыз, юзюмчюлерибиз сав йылны боюнда къуллукъ этип болдургъан тюшюмню тас этивсюз къолгъа алмакъ учун тырнашып айланалар.

Районда авлакъ ишлени барышы гьакъда баянлыкъ бере туруп, районну юрт хозяйство управлениесини ёлбашчысы Шагьабутдин Мустапаев булай деди:

-Барыбызгъа да белгили кюйде 2021-нчи йылны гьава шартлары юрт хозяйство тармакъны къуллукъчулары учун авур гелди ва бара. Табии авурлукълагъа да къарамайлы, районда авлакъ ишлер къурумлу оьтдю. Гьар тюрлю тармакълардан алынгъан тюшюмлер яман тюгюл деп айтсакъ, янгылыш болмасбыз.

Шагьабутдин Мустапаев ишлени гьакъында сёз юрюте туруп районубузну барлыгъы да, байлыгъы да гьисапланагъан юзюмчюлюк тармакъны къуллукъчуларыны, касбучуларыны загьматы гьакъда иштагьлы кюйде баянлыкъ бере:

-Бу йыл бизин районну юзюмчюлери, механизаторлар юзюмню мол тюшюмюн болдурмакъ учун йылны боюнда борланы бары да къуллукъларын агротехника гёрсетеген болжалларда сан янлы кюйде кютюп юрюдюлер. Этилген къуллукълагъа гёре тюеклени тюшюмю юрекни къувандыра.

Бугюнлерде юзюмчюлюк тармакъны къуллукъчулары учун лап къыставлу гюнлер. Ерлерде гюнешни емишини тюшюмю къайтарыла.

Бу йыл районну юзюмчюлери планлы кюйде тюшюм береген 1508 гектар майдандагъы юзюмлюклени тюшюмюн къайтарма тарыкъ. Шо участкалардан 14 минг тондан къолай тюшюм къайтарма умут бар.

Ерлерде юзюм гесив давам этиле. Буссагьатгъы вакътиге районда 614 гектар майданлардагъы участкаланы тюшюмю къайтарылып битген. Шо участкалардан 7100 тон юзюм алынгъан. Районда жыйылгъан юзюмню яртысындан да къолайы свежий кюйде (дестине) алывчулагъа сатыл­гъан. Къалгъаны – республиканы юзюм къабул этеген ва ишлетеген предприятиелерине берилген.

Айтма тарыкъ, бу йыл юзюм къабул этеген предприятиятиелер юзюмню гетген йылдан эсе 5-10 манатгъа багьа ала. Ягъарлыкъ-майлав материалланы, агъулу дарманланы, оьзге къуллукъланы багьаларына къарагъанда, кёп тюгюл буса да, гьар килогъа 5-10 манат къошулса, яман да тюгюл.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

3