«Халкъ бириксе, эл тувар»

Шоллукъда, 14-нчю сентябрде Къарабудагъгент РЦТК-ни бинасыны алдындагъы майданчасында «Халкъ бириксе, эл тувар» деген баш булан шо байрамгъа багъышлангъан чара оьтгерилди.

Чараны барышында, гьаманда йимик, ЦТКНР-ни, баш китапхананы къуллукъчулары, юртну школаларыны муаллимлери ва охувчулары оьзлени ортакъчылыгъын болдурдулар. Баш китапхананы фойесинде» «Халкъ бириксе, эл тувар» деген баш булан газетлерден ва китаплардан выставка тизилген эди.

Чараны А.Къаплановну атындагъы эргишилени хору «Дагъыстан» деген йыры булан ачды.

Сонг чараны юрютювчю, баш китапханчы Айзанат Пашаева байрамны, уьлкебизни табиат гёзелликлери, дослукъда ва бир­ликде яшайгъа миллетлери гьакъда хабарлады.

«Дагъыстан янгыз тавлар булан тюгюл, оьзюню кёп тюрлю тиллери ва миллетлери булан савлай дюньягъа белгили. Шо тиллерибизде бизин тарихибиз ва маданиятыбыз сакълангъан. Шо тиллерде биз оьзюбюзню гьислерибизни ва пикруларыбызны язабыз», — деди А. Пашаева.

Чарада чыгъып сёйлеген районну Жамият палатасыны ёлбашчысы Абдулгьамит Мамагишиев, районну социал ва яшёрюмлени масъалаларына къарайгъан бёлюкню ёлбашчысы Гюлжанат Темирова, районну маданият ва туризм масъалаларына къарайгъан бёлюкню ёлбашчысы Найида Мурзаева байрамны терен маънасы ва тарыкълыгъы гьакъда айтдылар.

Къарабудагъгент 3 номерли орта школаны тарихден муаллими Зумрут Пашаева байрамны тарихи ва 280 йыл алда болгъан тарих ишлени гьакъында хабарлады. Къарабудагъгент 3 ва 5 номерли орта школаланы охувчулары буса, Дагъыстангъа багъышлангъан шиъруланы охудулар ва йырланы йырладылар.

Олай да, чараны ахырында Агъай Къаплановну атындагъы эргишилени хоруну чебер ёлбашчысы Аскендер Исрапилов «Мени Дагъыстаным» деген йырны къаравчулагъа савгъат этди.