Меню
16+

Сетевое издание «Будни района»

10.09.2021 09:43 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Журналистлер булан ёлугъув

Автор: Нюрсагьадат Изамутдинова

Белгили кюйде, сентябр айны 8-нде Журналистлени гьакъыл бирлигини халкъара гюню белгилене. Шо байрам гюн 1958-нчи йыл журналистлени халкъара жамиятыны конгрессини къарары булан къабул этилген.

Тарихден белгили болгъан кюйде, 1943-нчю йылны сентябр айыны 8-нде Берлин шагьарда чех журналист ва адабият критик Юлиус Фучик жазаланып оьлтюрюлген. Оьлтюрюлгюнче туснакъгъа тутулгъан Ю.Фучик «Репортаж с петлёй на шее» деген китабын язып битдирген. Шо китабы саялы огъар оьлген сонг Дюньяны Халкъара премиясы берилген. Ону шо китабы дюньяны 70 тилине гёчюрюлген.

Журналистлени касбусу инг де къыйын ва къоркъунчлу касбуланы бириси. Неге тюгюл, олар яшавда ёлугъагъан тюзсюзлюклеге, адамсызлыкълагъа, рушбатчылыкъгъа, коррупциягъа халкъны гёзюн ачма сююп кёп танкъыт макъалалар яза. Тек, «тюзюн айтгъан туврасына ярамас» дегенлей халкъланы арасында тюзлюкню сюймейгенлер де ёлугъа.

Касбу ишине гёре, журналистлер къоркъунчлу гьалларда яшай…

Сентябр айны 8-нде журналистлер жыйылып, конференциялар, съездлер, яшавдан гетген журналистлени эсделигине багъышлап концертлер оьтгере.

Шолай ёлугъув чара сентябр айны 8-нде “Району яшаву” газетни редакциясында да оьтгерилди. Ёлугъувда охувчулар, баш китапхананы къуллукъчулары ортакъчылыкъ этди.

Ёлугъувну ача туруп, баш китапханачы А.Пашаева Къарабудагъгент 1 номерли орта школаны охувчуларына Журналистлени гьакъыл бирлигини халкъара гюнюн белгилевню тарихи гьакъда хабарлады.

Сонг ол «Районну яшаву» газетни баш редактору Асадулла Гьажиевге сёз берди.

- Журналислер яшавда, дюньяда, халкъ арада ёлугъагъан бары да кемчиликлеге охувчуланы гёзлерин ачмагъа сюе, тюзсюзлюклени гьакъында яза. Озокъда, оланы ойларын, пикруларын якъламайгъанлар яшавда кёп бар. Шолайлыкъда савлай дюньяда кёп журналистлер оьлтюрюлген. Ойлары булан бирче оланы оьзлени де ёкъ этме сюегенлер де табыла. Шолай Дагъыстанда да кёп журналистлени яшаву къыркъылгъан. Олар: ДР-ни милли сиясатыны, маълумат ва тыш байлавлукъ министри Магьаммат-салих Гусаев (2003-нчю йыл, 27-нчи август, Магьачкъала); «Дагестан» ГТРК-ны директору, белгили журналист ва публицист Гьажи Абашилов (2008-нчи йыл, 21-нчи март, Магьачкъала). «Мир вашему дому» деген ислам телеберилишлени юрютювчюсю Тельман Алишаев (2008-нчи йыл, 3-нчю сентябр, Магьачкъала); ДР-ни милли сиясатыны, маълумат ва тыш байлавлукъ министри Загьир Арухов (2005-нчи йыл, 20-нчы май, Магьачкъала); ДР-ни Президентини прес-къуллугъуну ва маълумат-аналитика управлениесини ёлбашчысы Гьарун Къурбанов (2011-нчи йыл, 28-нчи июль, Магьачкъала); «Черновик» деген жамият-сиясат газетни учредители Гьажимурат Камалов (2011-нчи йыл, 15-нчи декабр, Магьачкъала); «Хакикат» («Истина») деген республика газетни жаваплы секретары Малик Агьмадилов (2009-нчу йыл, 11-нчи август, Магьачкъала) ва олай кёп башгъалары,-дей А.Гьажиев.

Сонг ол охувчуланы «Районну яшаву» газетни журналистлери булан таныш этди. Оланы иши гьакъда хабарлады. Сёзюн узата туруп, ол охувчуланы «Районну яшаву» газетде ортакъчылыкъ этмеге чакъырды. Олай да, газетни баш редактору охувчуланы ана тилин билмеге ва сюймеге чакъырды. Къайда барса да, не ерде болса да, ана тилин унутмагъа, элине, ватангъа арт бермеге ярамайгъаны гьакъда айтды.

Олай да, сёз берилген кёп йыллар район газетде ишлеп турагъан Абдуллабек Самадов, жаваплы секретар Нюрсагьадат Изамутдинова, баш редакторну орунбасары Багьавутдин Самадов оьзлени иши гьакъда хабарлады, ана тилин унутмас учун газетни ролю уллу экени гьакъда айтды. Оьзлени сёйлевлеринде олар охувчулагъа, муаллимлеге ва китапханачылагъа заман табып редакциягъа гелгени саялы разилин билдирди.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

2