Россияны чемпионлары
Районубузну юртларында спортгъа айрыча тергев берилегени гёрюнюп тура. Айтагъаным, гьар тюрлю спорт булан машгъул болуп, йылдан-йылгъа оьр канзилеге гётерилеген спортчуларыбызны санаву да йылдан-йылгъа артып юрюй. Муна, сентябр айны баш гюнлеринде Кемерово шагьарда эсли спортчуланы арасында боксдан юрюлген Россияны чемпионатында бизин районну Дёргели юртундан чыкъгъан боксёрубуз Шарабутдин Атаевге де ортакъчылыкъ этмеге насип болгъан.
Ол, шо чемпионатда 86 кило авурлукъда ябушуп, “Россияны чемпиону” деген гьюрметли атгъа ес болгъан.
Эсгерилген шо ярышларда (чемпионатда) асрулары Къарабудагъгентден чыкъгъан, буссагьатгъы вакътиде шагьарда яшайгъан Жанбулат Бижамов да 75 кило авурлукъда ябушгъан ва алдынлыкъны къазангъан.
Шарабутдин Атаев 1999-нчу йылда Дёргели юртда тувгъан. Бокс булан машгъул болма башлангъаны да 8 йыллар бола.. Ол дёргелили айтылгъан боксёр, тренер Солтан Мигитдиновну уьйретивлери булан толу пайдаланып юрюй.
Россияны чемпионатында боксдан алдынлыкъ алгъан чемпионубуз Шарабутдин Атаевни, ону тренери Солтан Мигитдиновну, къарабудагъгентли улан, айтылгъан боксёр Жанболат Бижамовну спортда етишген гезикли уьстюнлюклери булан къутлайбыз.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
