Къошумубузну этмеге герекбиз!
Сентябр айны 6-нда Къарабудагъгент районну башчысы Магьмут Амиралиев транспорт компанияланы вакиллери булан ёлукъгъан. Ёлугъувну барышында районну башчысы районда коронавирус инфекциядан авруйгъанланы, аврувгъа къаршы этилеген ишлени гьакъында айтгъан. Шо аврувну яйылывуну алдын алывда адамлагъа вакцина этив аслу ерни тутагъанны эсгерген. Оьзюню сёйлевюнде М.Амиралиев гетген йылгъы гьалны эсге алгъан.
«Гетген йыл бизин ЦРБ-де 200-ден де къолай коронавирусдан авруп ятгъанлар бар эди. Шоланы дёртден бир пайы авур ва орта авур къайдада авруй эди, демек оланы къошум кислород булан таъмин этмеге герек эди.
Гьали буссагьат авруйгъанланы санаву аз, демек 17-ге тюшген, тек олагъа барысына да къошум кислород тарыкъ. Демек, бу йыл аврув гючлю геле, авруйгъанлар аз буса да, олар бек авруй.
Докторлар айтагъангъа гёре, аврувну энни гележек «толкъуну» гетегенинден эсе авур болажакъ. Шону яйылма къоймай алдын алмакъ учун бары да халкъ вакцина этдирмеге герек. Бугюнге районда вакцина этдиргенлени санаву 6 минге чыкъгъан.
Районда коллектив иммунитет болдурмакъ учун 30 мингден де къолай районлулар вакцина этдирмеге тарыкъ. Гетген йыл, кёп халкъ авруйгъан заман, ареклеге уллу юк ташыйгъан машинлени гьайдавчулары тыш янлардан кёп тарыкълы дарманланы, кислород баллонланы алып гелип, яхшы кёмегин болдурду.
Бу йыл да оьтген йылда йимик бары да халкъ бирлешмеге ва къыйын заманда бир-биревге кёмеклешмеге тарыкъбыз.
Гьарибиз аврувну яйылывун токътатмакъ учун оьз къошумубузну этмеге – демек, вакцина этдирип оьзюбюзню ва дос-къардашларыбызны, юртлуларыбызны яман аврувдан къорума герекбиз»,-дей районну башчысы Магьмут Амиралиев.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
