Меню
16+

Сетевое издание «Будни района»

10.09.2021 10:04 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Алдыбызда сайлавлар

Автор: Багьавутдин Самадов

Гьаманда йимик, оьтген талатгюн, 7-нчи сентябрде район администрацияны жыйынлар оьтгерилеген уллу залында районну администрациясыны аппаратыны гезикли генгеши оьтгерилди. Генгешни ишинде район администрацияны управлениелерини ва бёлюклерини ёлбашчылары ва юртланы башчылары ортакъчылыкъ этдилер.

Районну администрациясыны аппаратыны гезикли генгешин район администрацияны башчысыны орунбасары Жалалутдин Жамалутдинов ачды ва юрютдю. Ол генгешни ортакъчылары булан саламлашгъан сонг, Къарабудагъгент районну территориал сайлав комиссияны ёлбашчысы Магьамматсайит Алпанаевни 17-19-нчу сентябрде оьтгерилежек сайлавланы гьакъында баянлыкълар бермеге трибунагъа чакъырды.

Трибунагъа гётерилген М. Алпанаев оьзюню сёйлевюнде эсгерген кюйде, 17-19-нчу сентябрде савлай Россияда сайлавланы Бирикген гюню оьтгерилежек. Демек, шо 3 гюнню узагъында РФ-ни Пачалыкъ Думасына бютюн Россияда сайлавлар оьтгерилежек. Демек, россиялылар Пачалыкъ Думаны VIII чакъырывун сайлажакъ. Сайлавланы гьакъындагъы законгъа гёре, сайланажакъ 450 депутатны 225-си партия сиягьлагъа ва къалгъан 225-си – бир мандатлы округлагъа гёре сайланажакъ.

Олай да, шо 3 де гюнню ичинде дагъыстанлылар ДР-ни Халкъ Жыйыныны VII чакъырывуна депутатлар сайлажакъ. Республикабызны парламентине сайлавчулар тавуш берген партиялар ва оланы вакиллери сайланажакъ.

«Федерал ва республика даражадагъы сайлавлар булан янаша районубузну ичиндеги 5 муниципал къурулувда да ерли юрт Жыйынлагъа сайлавлар оьтгерилмеге гёз алгъа тутула. Демек, «Манасгент юрт» муниципал къурулувну юрт Жыйыныны янгы чакъырывуна сайлавлар оьтгерилежек. Шону булан янаша Дёргели, Агъачавул, Зеленоморск ва Уллубийавул юртларда да 1-2 мандатгъа сайлавлар оьтгерилежек», — деп айтды оьзюню сёйлевюнде М.Алпанаев.

Къарабудагъгент район ТИК-ни ёлбашчысыны сёзлерине гёре, Роспотребнадзорну таклифлерин ва талапларын гёз алгъа тутуп, сайлавлар оьтгерилмеге тарыкъ. Олай да, сайлавланы барышында видеорегистраторлар къолланажакъ. Сайлав хас документлени аманлыкъда сакъламакъ учун сейфлер болмагъа тарыкълыгъын ол ачыкълашдырды.

Генгешни гьасилин чыгъара туруп сёйлеген район администрацияны башчысыны орунбасары Ж.Жамалутдинов район ТИК-ни ёлбашчысына ва районну ичиндеги бары да юртланы башчыларына сайлавланы къурумлу ва оьр даражада оьтгермеге тапшурду.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

3