17 йыл оьтсе де…
Намарт террорчуланы тюбю ёкъ муратларыны натижасында, 17 йыллар алда сентябр айны башында Беслан шагьарда болгъан вагьшилик даимликге, тарихге гирген деп айтмагъа ярай. Охув йылны башында байрамча гийинип гелген яшлар, оланы узатып гелген ата-аналар бирде къаравулланмагъан кюйде террорчуланы къамавуна тюшюп, сувгъа яллап, ашсыз-сувсуз намартланы къамавунда зар чекгени, шо гюнлени ичинде Беслан школада террорчуланы къолундан, оланы атылтывларындан 334 адам, шоланы да 200-денде къолайы охувчу яшлар. Къанлы гёзьяш тёгюлген шо гюнлени бирев де, бир заманда да унутуп болмас.
Шо къайгъылы агьвалатлы гюнлеге багъышланып алдагъы гюн, 3-нчю сентябрде, райцентрдагъы У.Д.Буйнакскийни атындагъы ял алагъан бавда, эсделиклени алдында 17 йыллар алда, Беслан шагьарда террорчуланы къолундан гечинип гетген бир гюнагьсыз охувчу яшланы, оланы ата-аналарыны ва якълав къурумланы къуллукъчуларын эсге алывгъа багъышлангъан мердеш оьтгерилди. Шо мердеш, районну культура бёлюгюню ва районну баш китапханасыны ёлбашчыларыны сиптечилиги булан эсде къалар йимик арив оьтгерилди. Шо мердешни китапхананы къуллукъчусу Азинат Пашаева ачды ва юрютдю. Ол башлап, эсге алывгъа ва пашманлыкъгъа жыйылгъанлагъа, Бесланда болгъан авур къайгъылы гюнлени гьакъында хабарлады. Сонг Къарабудагъгент школаланы охувчуларына сёз берилди. Охувчулар охуйгъан къайгъылы шиърулар яшланы тюгюл уллуланы да гёзлерин сувландырды. Сонг сёз берилген маданият бёлюкню ёлбашчысы Найида Мурзаева, районда ветеранланы къурумуну ёлбашчысы Абдулгьамит Мамагишиев ёлдашлар да оьзлени эсге алывларында намарт ойлу террорчуланы налатлап сёйледилер. Мердешни ортакъчыларын гьар даим де террорчулардан арек турмагъа чакъырдылар. Сонг районну йыравлары Умукюсюм Шамилова, Аскендер Исрапилов шо пашманлыкъны гюнюне багъышлап оьзлени арив йырларын йырладылар.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
