Янгы охув йылны алдында

Т.Хизриеваны сёзлерине гёре, бизин районубузда бугюн-буссагьат 67 билим берив идара иш гёре, шоланы 28-и – яшлар бавлары, 29-у – школалар, 10-су – къошум билим берив идаралар ( ДЮСШ ва ЦДОД). Бары да эсгерилген охув ожакъланы лицензиялары ва аккредитациялары бар.

Олай да, от тюшювню билдиреген къувунлу кнопкалары ва ­оьзге алатлары бар. Районну ичиндеги бары да школаланы ва 8 яшлар бавуну видеокамералары бар. Уллубийавулдагъы 12 номерли «Фиалка» деген яшлар бавуну ва Къарабудагъгент гимназияны хас медицина кабинетлери ишлей.

Гьар йыл оьтгерилеген ремонт ишлер учун бары да билим берив ожакълагъа районну бюджетинден 3 миллион 500 минг манат харж гёрсетилген. Шоллукъда, от тюшювню аманлыгъын болдурмакъ учун Манас, Манасгент, Гьели ва Къурбуки 1 номерли орта школаларда ишлер тамамлангъан ва Уллубийавул орта школада шо ишлер юрюлюп тура.

«Билим берив» деген милли проектни «Современная школа» федерал проектине районну 7 школасы гирген. Шо школалагъа физика, химия, биология ва технология предметлерден тарыкълы къураллар берилген.

Къарабудагъгент 5, Паравул 3 номерли, Аданакъ, Къакъамахи ва Зеленоморск орта школалар бузукъ (аварийный) деп гьисаплангъан буса да, шоларда да ремонт ишлер этил­генин эсгере туруп, районну билим берив управлениесини ёлбашчысы Т.Хизриева буссагьат школаларда 24 транспорт бар экенлигин айтгъан сонг, эсги 2 автобус янгыларына алышдырылгъанын, янгы 5 шолай транспорт алынгъанын ва дагъы да 11 алынажагъын ачыкълашдырды.

Йылны башында болгъан табии хатабалагьлар Къарабудагъгент 3 номерли, Къакъашура 1 номерли, Губден орта школалагъа, олай да, «Юлдуз» ва «Улыбка» яшлар бавларына зарал гелтиргенин аян этди.

Билим берив управлениени ёлбашчысы Т.Хизриеваны сёзлерине гёре, районну школаларына 9912 охувчу гелмеге бола туруп, 15150 яш охуй. Олай да, бу йыл 1-нчи класгъа абат алагъан охувчуланы санаву 2000-ден артажагъын ачыкъ этди. Шоллукъда, Къарабудагъгент гимназия, 2 ва 3 номерли, Паравул 3 номерли, Манас ва Зеленоморск орта школалар 3-нчю сменге чыкъмагъа борчлу болажакъ. 3100-ден артыкъ гиччипав яшлар бавуна электрон гезикге токътагъан. Демек, олар яшлар бавларына бармайлы къалмагъа имканлыкъ бар.

Т.Хизриева оьзюню сёйлевюнде охувчуланы китаплар булан таъмин этивю гьакъда да маълуматлар берди. Шоллукъда, китаплар булан таъмин этив 90 процентге етише. 5-11-нчи класланы охувчуларына етишмейген китапланы алмакъ учун республиканы билим берив министерлигине кагъызлар йиберилген.

Интернет ва оьзге байлавлукълагьа школалар ва яшлар бавлары къошулгъанын, шоланы хас сайт­лары бар экенлигин айтгъан сонг, Т.Хизриева компьютерлер ва ноутбуклар булан охувчуланы таъминлиги гьакъда айтды. Демек, районну школаларында 71 мультимедийный проектор, 49 интерактивный проектор ва 68 интерактивный комплект бар.

Оьзюню сёйлевюню ахырында районну билим берив управлениесини ёлбашчысы Тажли Хизриева районну ичиндеги бары да билим берив ожакълар янгы охув йылгъа гьазир экенлигин эсгерген сонг, ремонт ишлени оьтгермек учун гёрсетилеген харж маяланы, багьалар гётерилегенин гёз алгъа тутуп, артдырмагъа таклиф этди.

Районну билим берив управлениесини ёлбашчысыны докладына районну гьакимбашы Магьмут Амиралиев оьзюню сесленивюн берди. Гьаманда йимик, М.Амиралиев билим берив лап да ал сыдыраларда токътагъанын ачыкълашдыргъан сонг, район администрация школалагъа, яшлар бавларына ва къошум билим берив идараларына болагъан кёмегин этежегин ташдырды.

Оьзюню сёйлевюню ахырында районну ёлбашчысы М.Амиралиев билим берив управлениени ёлбашчысы Т.Хизриевагъа вакцина этив ишге муаллимлени, охувчу яшланы ата-аналарын къуршамагъа ва шо гьакъда англатыв иш юрютмеге тапшурду.