Ябушув узатыла

Шо ВКС-ни барышында Къарабудагъгент районну башчысы Магьмут Амиралиев ва Къарабудагъгент район больницаны баш врачы Расул Гьиравов оьзлени ортакъчылыгъын болдурдулар.

«Яхшы янгылыкълар ёкъ деп айтмагъа ярай. Демек, гьар гюн 200-205 янгы адам авруй, 450-ге ювукъ адам больницагъа тюше. Май айда авруйгъанланы санаву 40-50 эди буса, бугюнлерде шо 10 керен артгъан», -деп башлады ВКС-де Сергей Меликов оьзюню сёйлевюн.

- Авруйгъанланы санавуну артагъаныны себеби – гийирилген чараланы адамлар тутмайгъаны ва вакцина этивню барышы осал экенлиги. Укол этген адам аврув булан авур авругъан деп бизин врачларыбыз айтмай, эгер ону оьзге аврувлары болмагъан буса.

Авур аврувланы санаву артагъангъа гёре, таза гьаваны (кислород) тарыкълыгъы да арта. Шогъар буса, медицина идаралар барысы да гьазир тюгюл. Шо саялы, хоншу ва оьз­ге регионлардан шо таза гьаваны алмагъа борчлубуз.

Вакцина этмеге сюегенлени санаву гюн сайын артагъангъа сююнмейли болмайбыз. Вакцина тийишли чакъы бар, гьар гюн республикабызда 14 минг адамны вакцина этмеге имканлыкъ бар,-деп узатды ДР-ни Башчысыны заманлыкъгъа борчларын кютеген С.Меликов ­оьзюню сёзюн.

Олай да, С.Меликов оьзюню сёйлевюнде халкъ булан къатнашагъан ва ишлейген бир-нече категория касбучулар ва ишчилер вакцина этмеге тарыкъ экенлигин бирдагъы керен ачыкълашдырды. Шо ерде ол шо ишни этивде ялгъан сертификатлар алагъан ва сатагъан адамланы атына гери урув (предупреждение) билдирди. Демек, шолай адамлар закон булан жавапгъа тартылажагъын айтды.

Республикабызда алданокъ гийирилген чаралар узатылагъанын эсгере туруп, ол 65 йылдан оьмюр чагъы уллулар уьйде турмагъа тарыкълыгъын айтды. Эгер олар вакцина этген буса, толу кюйде ишге гелмеге ихтияры барлыгъын аян этди.

Гертилей де, бизин районубуздагъы коронавирус аврувну яйылыву ва вакцина этивню барышыны гьалы макътардай тюгюл. Айтагъаным, гьар гюн район больницагъа тюшегенлени санаву 10-дан арта. Олай да, Магьачкъала, Каспийск ва Избербаш шагьарлагъа тюшегенлер де бар.

Вакцина этдиргенлени санаву умуми алгъанда 4500-ден айлангъан. Шо буса, нечакъы бола буса да аз. 85 мингден артыкъ адам яшайгъан ва 52 мингден артыкъ 18 йылдан оьмюрю уллу адамлар бар район, 25 минг сама адамгъа вакцина этмеге герек деп врачлар айта. Демек, шолай этилсе халкъны коллектив къоруву (иммунитет) болажакъ.

Къарабудагъгент районну гьакимбашы Магьмут Амиралиев оьт­герилеген бары да генгешлени ва ёлугъувланы вакътисинде коронавирус аврувну яйылывун токътатмакъ ва алдын алмакъ учун чаралар гёрмекни гьайын эте. Олай да, вакцина этивню артдырмакъны жаваплы къурумлагъа ва къуллукъчулагъа тапшура.