Фермерлерибиз неге къазаплана?!

Шо якъдан алгъанда артдагъы вакътиде бизин районда да юрт хозяйство топуракъланы асывлу къоллав да, ишлетив де яхшы янгъа бурулув ачыкъдан-ачыкъ гёрюне. Артдагъы 10-15 йыл­ны анализ этип къарасакъ, ишлетилеген топуракълар йыл сайын артып юрюй.

Республиканы гьакимбашлары адамлагъа иш ерлер болсун деп районлагъа борла, емиш бавлар орнатма тапшурувлар салып, оланы яшавгъа чыгъывуна тергевюн болдуруп турду.

ДР-ни Халкъ Жыйыныны алдагъы спикери Хизри Шихсайитовну тергевю булан бизин районда да, хыйлы майданлагъа борла, бала тереклер орнатылып, гьали залим бавлар болгъан.

Районда къылчыкълы ашлыкълар, кёп йыллыкъ отлар, бахча оьсюмлюклер чачылагъан майданланы къадары хыйлы артгъан.

Топуракълар кёп ишле­тилген чакъы, гьалиги девюрде тувулунагъан масъалалар да арта.

Оьр шанжалларда олтургъанлар: «Сиз топуракъланы ишлетигиз, биз сизин сугъарыв сув булан таъмин этежекбиз!»-деп берген авуз инандырывлары гьали ярты ёлда къалды.

Бир сёз булан айтгъанда, районну юрт хозяйство продукталар болдурувчулары, айрокъда юзюмчюлерибиз, сугъарыв сувгъа байлавлу авур гьалгъа тарыгъан. Айрокъда Къурбуки, Уллубийавул юрт муниципал къурулувланы топуракъларына орнатылгъан борла, бала тереклер, сугъарма сув ёкъ саялы, къуруп бара, тюшюм береген юзюм бавланы гьалы, гёрюнюшю де макътардай тюгюл.

Районну башчысы М.Амиралиев районну юрт хозяйство продукталар болдурувчуларын сугъарыв сувгъа бакъгъан талапларын ёрукълу чечмек учун оьзюню къолундан гелеген бары гьаракатны этме айланагъын яшырма тарыкъ тюгюл. Тек, ону гьаракаты гьалиге натижа бермей. Салкъын кабинетлерде олтургъан чиновниклер юртлу загьматчыланы агьын эшитмей, къулакъларын къысып пысып туралар.

Август айны 4-нде районну аслу юзюм болдурувчулары сугъарыв сувну масъаласы булан районну юрт хозяйство управлениесини ёлбашчысыны ишчи кабинетине жыйылгъанлар.

Онда Къарабудагъгент юрт муниципал къурулувну башчысы Магьамматсолтан Гьасанов, юртдагъы уллу юзюмчюлюк предприятиелени ёлбашчылары: К.Канзитдинов, А.Исрапилов, З.Абдул­лагьатов, А.Айдиев, Къазакъмурзаев, «Къурбуки» КФХ-ны ёлбашчысы, Уллубийавул муниципал къурулувну вакили, фермер Гьизбулла Арсланалиев, ДР-ни ФГБУ «Минмелиоводхозну» бизин райондагъы филиалыны баш инжинери М.Гьажиев ортакъчылыкъ этдилер.

Олар республиканы башын тутгъанлар юрт хорзяйство продукталар болдурувчуларын сугъарыв сув булан таъмин этме айланмайгъанына уллу къазапланып сёйлей эдилер. Оланы да англама къыйын, тюгюл кёп харж чыгъарып, къуллукъ этип болдургъан юзюм, сугъарма сув ёкъ саялы, къыр юзюм йимик увакъ.

Гьар къайсы ёлугъувда да алгъасавлу-къычырыкъ сёйлейген ООО Агрофирма «Герей-тюзню» ёлбашчысы К.Канзитдинов: «Август айны 20-сы болгъунча юзюмлюклени сугъарма сув болмаса, биз бу йылны тюшюмюню 40 процентин тас этебиз. Дыгъарлар этгенбиз, сувгъа гьагъын тёлегенбиз бизге тарыкъ заман сугъарма сув берип болмайгъан къурум кимге тарыкъ?»,-деп башгъа коммерция кюрчюде къурум ачма таклиф этди. Бирлери гележекде ФГБУ Минмелиоводхозну бизин райондагъы къурумунда сугъарыв сувгъа гьакъ жыягъан айрыча къурум ачма таклиф этгенлер де болду. Шо гюн районну башчысы М.Амиралиев районну юрт хозяйство продукталар болдурувчуларыны сугъарыв сувгъа бакъгъан талапларын чечмек, насосланы ишлетмек учун республиканы гьукуматыны председатели булан ёлукъгъан жыйылгъанлар ондан тел урув къарап турдулар. Тюш бола туруп районну башчысындан маълумат гелди, масъала чечилмеген.

Фермерлерибизни бирлери сувну масъаласы булан ДР-ни Халкъ Жыйыныны бизин райондан депутаты Магьамматсолтан Байболатович булан ёлукъма, ­оьзгелери ДР-ни Башчысыны заманлыкъгъа борчларын кютеген Сергей Меликов бизин районну территориясында ерлешген ял алагъан уьйге барагъан ёлда ону булан ёлугъуп районда сугъарыв сув булангъы гьалны дурус англатма, ёлукъма герек дейгенлер де болду.

Бир зат – ачыкъ къарагъанда республика оьлчевдеги чиновниклер районубузну юрт хозяйство продукталар болдурувчуларыны къыйынлыкъларына ичи бушагъан гёрюнмейгенге ошай.