“Яшны школагъа гьазирле”

Эсгерилген социал гьаракатны аслу мурады – етим ва гелими осал агьлюлерде яшайгъан яшлагъа кёмегин болдурмакъ. Демек, шолагъа янгы охув йылны алдында билим алмагъа тарыкъ болагъан китаплар, тептерлер, къаламлар, портфеллер ва оьзге алатлар булан кёмеклешмек.

Шоллукъда, «Яшны школагъа гьазирле» деген социал гьаракат алдагъы гюнлерде район администрацияны бинасында оьтгерилди. Айтагъаным, шо чараны барышында районну ичиндеги 50 яшгъа кёмек болдурулду.

Шо гьаракатда районну­ администрациясы, районну прокуратурасы ва Дагъыстанны къатынларыны союзуну район бёлюгю эсгерилген категориялы яшлагъа оьзлени савгъатларын тапшурдулар. Олай да, шо гьаракатда «Бирлешген Россия» деген сиясат партияны Къарабудагъгент ерли район бёлюгю де оьзюню ортакъчылыгъын болдурду. Оьтге­рилген гьаракатгъа районну ич ишлер бёлюгюню къуллукъчулары да къошулду.

Район администрацияны опекунлукъ бёлюгю районну ичиндеги етим яшланы ва гелими аз агьлюлерде яшайгъан яшланы сиягьын алданокъ онгаргъан эди. Шо гюн шолагъа савгъатлар тапшурулду.

Шо социал гьаракатны барышында сёйлеген район администрацияны башчысыны 1-нчи орунбасары Ибрагьим Абдулмежитов, район администрацияны ёлбашчысыны орунбасары Жалалутдин Жамалутдинов, «Бирлешген Россия» деген партияны Къарабудагъгент район бёлюгюню исполнительный секретары Бекболат Сахаватов ва район администрацияны социал ва яшёрюмлени масъалаларына къарайгъан бёлюгюню ёлбашчысы Гюлжанат Темирова шу рагьмулу ишде къол къошгъан ва кёмеклешген идаралагъа ва оланы ёлбашчыларына баракалласын билдире туруп, районну ичиндеги башгъа къурумланы да шу пайдалы ва та­рыкълы ишге къуршалмагъа чакъырдылар.

Эсгерилген гьаракатгъа «Инсан» деген рагьмулу фонд да оьзлени къошумун болдурду. Демек, шо фонд алдагъы гюнлерде Уллубий­авулда осал гелими бар агьлюлерде яшайгъан 20 яшгъа шолай савгъатлар тапшурду.

«Яшны школагъа гьазирле» деген социал ва кёмеклешив гьаракат охув ­йылны башы болгъунча давам этиле.