Тарих сагьат оьтгерилди
Белгили кюйде, гьар йыл август айны 23-нде Совет асгерлер Курск ябушувда немис-фашист асгерлени тозгъан гюнюн белгилей. Шо тархгъа байлавлу болуп, Къарабудагъгент Баш китапхананы къуллукъчулары «Курск ябушувну от-ялыныны ва тютюнюню тюбюнде» деген онлайн-чара оьтгерди.
Чарада Къарабудагъгент 5 номерли орта школаны тарих дарсларыны муаллими Къазимагьаммат Зайналов, олай да китапхананы охувчулары, юрт музейни къуллукъчулары ортакъчылыкъ этди.
Тарих сагьатда Баш китапханачы А.Пашаева Курск ябушувну гьакъында хабарлады.
Сонг сёз берилген Къ.Зайналов Курск ябушувну гьакъында маълуматлар гелтирип сёйледи.
-Курск ябушув 1943-нчю йылны июль айыны 5-нде башланып, август айны 23-нде битген. Демек, шо къыргъынлы ябушув ай ярымдан да къолай юрюлген.
Совет асгерлер душмандан сакълайгъан ва душмангъа гьужум этеген кёп тюрлю операциялар оьтгерген. Курск ябушув Уллу Ватан давда болгъан инг де уллу ябушувланы бири деп гьисаплана. Шо давларда 250 мингден де къолай совет солдатлар жанын къыйгъан.
Оланы арасында дагъыстанлылар, бизин районлулар да болгъан. Демек, уллаталарыбыз, оланы да аталары, дос-къардашларыбыз да Курск ябушувда ортакъчылыкъ этген.
Бугюнлерде республикада курск ябушувланы 280 ортакъчысы къалгъан.
Совет солдатланы къоччакълыкъларын, кёп санавдагъы тас этивлени гележек наслулагъа унутмагъа ярамай. Оланы эсделигине биз гьар даим макътав этмеге борчлубуз. Атышывланы, от тюшювлени, тютюнлени тюбюнде ватанын якълагъан, къурбан болгъан игитлерибизни эсделигине биз не гьюрмет этсек де, кёп тюгюл.
Курск ябушув битген гюн, август айны 23-ю, совет асгерлер немис-фашистлени тозгъан гюн деп белгилене…, — деп хабарлай тарихчи Къазимагьаммат Зайналов.
Китапхананы актив охувчулары муаллим Къ.Зайналовгъа Курск ябушувну гьакъында соравлар берип, олагъа жаваплар алды.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
