Меню
16+

Сетевое издание "Району яшаву"  «Будни района»

27.08.2021 09:54 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Муаллимлени гезикли генгеши оьтгерилди

Автор: Нюрсагьадат Изамутдинова

Август айны 21-нде Магьачкъалада видеоконференция байлавлукъ къайдада ДР-ни Башчысыны заманлыкъгъа борчларын кютеген Cергей Меликовну ортакъчылыгъы булан билим берив идараланы къуллукъчуларыны гезикли генгеши оьтгерилди.

Генгешни аслу масъалалары – ­оьтген охув йылны гьасиллери, янгы охув йылгъа гьазирлик гёрюв, гележек наслу булан оьтгерилмеге герекли тарбия ишлер, олай да билим берив тармакъны ишин оьсдюрювде этилмеге гёз алгъа тутулгъан планлар, муаллимни жамиятны арасында абурун гётермек.

Генгешни башында С.Меликов муаллимлени гезикли генгешин бу йыл да онлайн къайдада оьтгермеге тюшгенни ва республикабыздагъы къыйын эпидемиология гьалны гьакъында айтды.

- Сан янлы, эффектли билим берив Россияны, ДР-ни гележекдеги оьсювюне инвестициялар болуп токътай. Шону англап, уьлкени ёлбашчылары янгы школалар, яшлар бавларын, къошум билим берив идараланы ишлемеге кёп харжлар гёрсете, педагоглагъа алапаларын артдырмакъны гьайын эте, — деди С.Меликов оьзюню сёйлевюнде.

Олай да, С.Меликов артдагъы 2 йылны ичинде билим берив тармакъда юрюлеген ишлеге федерал бюджетден 16 миллиард харж бе­рилгенин айтды. Оьзюню сёзюн узата туруп, ол билим беривню сан янын гётерив толу кюйде муаллимден гьасил болагъанны, жамият бирлешип муаллимни абурун гётермекни гьайын этме герегин эсгерди.

Сонг ол бу йылны июль айында Гьукуматны къарары булан билим беривде ишлейгенлени алапаларын 20 процентден къолай гётермеге гёз алгъа тутулгъаны гьакъда айтды. Бугюнлерде республикада 200-ден де къолай бузукъ гьалдагъы школалар барын, 2023-нчю йылны ахырына 160-дан да къолай янгы билим берив идаралар гиргени, оларда бажарывлу касбучулар ишлеме гийирилгени гьакъда эсгерди.

2021-нчи йылны ахырына 16 школа, 57 яшлар баву ишге берилмеге, 100-лер булан билим берив идараланы биналарына ремонт этилмеге, 2022-нчи охув йылда 145 школа янгы къураллар булан таъмин этилмеге гёз алгъа тутулгъанын аян этди.

ДР-ни билим берив ва илму министрини борчларын заманлыкъгъа кютеген Ягьия Бучаев билим берив тармакъны бары да къуллукъчуларын янгы башланагъан охув йыл булан къутлагъан сонг, министерликни ягъындан регионда билим беривню сан янын гётермек муратда бар гьаракат болдурулажагъын айтды.

Оьзюню сёйлевюнде ол билим берив тармакъда кёп алышындырыв­лар (реформы) болдурулма, 2030-нчу йылгъа толу кюйде билим беривню потенциалын гётермеге герегин, шогъар гёре гелеген янгы охув йылдан башлап иш юрюлежегин эсгерди.

Я.Бучаев федерал ва республика программалагъа гёре 2023-нчю йылгъа республикада 166 билим берив объект: 82 школа, 84 яшлар баву къурулмагъа гёз алгъа тутулгъанын ташдырды.

ДР-ни билим берив ва илму министерлигини далиллерине гёре, 2021-нчи йылны ахырына 44 школа (17 минг ер) ва 70 яшлар баву (10 минг ер), олай да 1-нчи сентябргъа 20 билим берив ожакъ: 13 яшлар баву ва 7 школа ишге берилмеге плангъа гирген.

Сонг да, РФ-ни ярыкъландырыв министерлигине ДР-ни билим берив ва илму министерлигини ягъындан 23 школа къурмакъ учун субсидия алмагъа заявка берилген. Шо заявкагъа къол салынгъан ва 8,5 млрд манат акъчаны алмакъ учун кагъызлар гьазирленегенни, дагъы да 13 школа ишлемек учун 5,5 млрд манат субсидия алмагъа заявкалар йибермеге гёз алгъа тутулгъанын да Я.Бучаев эсгерди.

Генгешде сёйлеген Роспотребнадзорну регионал управлениесини ёлбашчысы Николай Павлов Дагъыстандагъы эпидемиология гьал бек бузукъ экенни эсгере туруп, авруйгъанланы санаву гюн сайын кёп болагъанны, артдагъы вакътилерде яшлар кёп авруйгъанны, шогъар гёре билим берив тармакъны къуллукъчулары ва яшланы ата-аналары COVID-19 инфекциягъа къаршы вакцина этдирмеге герегин билдирди.

Региондагъы эпидемиология гьалгъа гёре сёзню узата туруп, С.Меликов яшланы аманлыгъы учун бары да чаралар гёрюлмеге герегин, школаларда ва яшлар бавларында коронавирус инфекцияны яйылывуну алдын алмакъ учун билим берив идаралар бары сакълыкъны болдурма, охувчулар дистанция къайдада билим алывгъа чыкъмасны гьаракатын этмеге тапшурувлар берди.

Генгешни ахырында республиканы билим берив тармагъыны яхшы иш гёрсетген къуллукъчуларына пачалыкъ савгъатлар тапшурулду.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

3