Янгы охув йылны алдында...

-Алибек Къайирбекович, инг башлап районда школа чагъына етишмеген яшлар тарбияланагъан билим берив идараланы иши, оланы янгы охув йылгъа гьазирлиги гьакъда газетибизни охувчуларына не айтма боласыз?

-Къарабудагъгент районда 2020-2021-нчи охув йылда школа чагъына етишмеген яшлар тарбияланагъан 28 идара иш гёрдю, шоланы ичинде 3-юсю пачалыкъ идаралар тюгюл, демек, оьз еслигиндеги яшлар бавлары.

Бары да яшлар бавланы коллективлери ФГОС-ну талапларына гёре къурулгъан программаланы яшавгъа чыгъарыв мурат булан ишлей.

Школа чагъына етишмеген гиччипавланы тувгъан гюнден башлап 7 йылгъа ерли яшлар бавларына къуршав – 23 процент, 2 йылдан 7 йылгъа ерли – 31 процент, 3 йылдан 7 йылгъа ерли – 37 процент. Демек, район администрация гиччипавланы яшлар бавларына къуршамакъ учун кёп иш этсе де, масъала гьали де чечилмеген. Яшлар бавларына къошум биналар ишлене, бёлюклер ачыла, янгы яшлар бавлары къурула, оьз еслигиндеги яшлар бавлар ишге бериле. Тек, яшлагъа ерлер гьали де етишмей.

Къакъашура, Аданакъ, Къарабудагъгент, Дёргели, Жанга, Янгы Паравул юртларда яшлар бавларында ерлер етишмейгенлиги айрокъда бек гьис этиле. Бу охув йылда Къарабудагъгент, Дёргели, Жанга юртларда яшлар бавлары ачылажакь. 2025-нчи йылгъа дагъы да 8 яшлар бавларын къурмагъа гёз алгъа тутулгъан. Яшлар бавлагъа яшлар электрон гезик булан къабул этиле. Оьтген охув йылда шо гезикни 2068 адам къоллагъан. Районну яшлар бавларында 356 педагог ишлей, оланы 269-уну оьр билимлери, 87-сини орта касбу билимлери, 36 педагогну оьр ва биринчи категориялары бар.

-Орта билим береген охув ожакъланы янгы охув йылгъа гьазирлиги нечикдир? Оьтген охув йылда олар не проектлерде ортакъчылыкъ этди?

-2020-2021-нчи охув йылда Къарабудагъгент районну орта билим берив ожакъларына 27 орта школа ва 1 школа гимназия гире эди.

2020-2021-нчи охув йылда районда 14774 охувчу, 764 клас-комплектлер бар эди.

Оьтген охув йылда районда 5 школа бир сменде, 2 школа (Манас СОШ ва Паравул СОШ №3) уьч смен булан ишледи. Охувчулар ФГОС-гъа гёре дарсдан тышдагъы чалышыв булан къуршалгъан. Профиль къайдада билим берив янгыз Гимназияда къурулгъан.

Школаларда 2178 адам ишлей, шоланы 1206-сы – муаллимлер. Оланы 222-сини оьр категориялары бар.

Бу йыл билим берив идараланы ремонт ишлерине 3366000, пожарный сигнализацияланы онгарывгъа, къалкъыланы от тюшювден къоруйгъан ишлеге 1764438 манат берилген.

-Алибек Къайирбекович, районда бу йыл «100 школа» деген проектде ортакъчылыкъ этгенлери болдуму?

-2020-нчы охув йылда районну 8 школасы «100 школа» деген проектде ортакъчылыкъ этди. Шолар: Къарабудагъгент 1,2,3 номерли, Паравул 1 номерли, Къакъашура 1 номерли, Ленингент, Сираги ва Жанга орта школалар.

Гьар школа 3 миллион 100 минг манатгъа школаларыны тюрлю ремонт ва янгыртыв ишлерин этди. Шо харжны 2 миллионун республика бюджетден, 100 мингин район, 1 миллионун буса спонсорлар берди.

-Къошум билим береген къурумлар районда нече бар?

-Районда 10 къошум билим береген идаралар бар (1 – ДДТ ва 9 – ДЮСШ). Охувчуланы олагъа къуршаву 40 процентге етише.

-Билим беривню гьасиллери выпускниклени экзаменлер берген кююнден гьасил болагъаны белгили. Шо масъала инг аслу масъалаланы бириси экени де бизин барыбызгъа да ачыкъ. Охувчуланы бу йылгъы Пача­лыкъ гьасил чыгъарыв аттестациясы гьакъда да айтгъаныгъызны сюер эдик.

- Охув йылны башындан тутуп 9-нчу ва 11-нчи класланы выпускниклери булан ГИА-гъа гьазирлев ишлер юрютмекни биз биринчи ерге салгъан эдик. 2020-нчы йылны октябр айында ОГЭ ва ЕГЭ-лени бермек учун выпускниклер предметлени танглагъан эди. ЕГЭ-лени бермеге бу йылны 269, гетген йылланы 34 выпускниги арза язгъан эди, олай да школаны битдирмей къойгъан 9 охувчу бар эди. ОГЭ-лени берме сюеген бу йылны 1138 выпускниги ва алдагъы йыллар 9 класны битдирмей къойгъан 14 охувчу бар эди.

ОГЭ-лени ва ЕГЭ-лени оьтгермек учун ППЭ-лени 4 ёлбашчысы РЦОИ-ге барып гьазирленип гелген эди. Район билим берив управлениеде ЕГЭ-леге 56, ОГЭ-леге 190 къурумчу гьазирленген эди. Техника якъдан хас касбучулар РЦОИ-де гьазирлик гёрген эди. ЕГЭ-лени гьасиллерине гёре, орус тилден орта бал – 61, математикадан (профильная) – 27, физикадан – 46, биологиядан – 40, химиядан – 40, тыш уьлкелени тиллеринден – 14, тарихден – 41, обществознаниеден – 47, информатикадан – 48, орус адабиятдан – 57 болду.

ОГЭ-леге гёре выпускниклени 98 проценти аттестатлар алды.

-Алибек Къайирбекович, 2020-2021-нчи охув йылда оьтгерилген олимпиадаларда, конкурсларда районну охувчуларыны республика оьлчевде етишген уьстюнлюклерин эсгерсегиз, арив болар эди.

- Шолай билимли ва бажарыв­лу охувчуларыбызны ва оланы ёлбашчыларыны атларын мен кёп сююп эсгермеге гьазирмен:

«Шаг в будущее» деген конкурсда Къарабудагъгент гимназияны охувчулары Мадина Сулейманова (7-нчи клас, ёлбашчысы – Т.Багьавутдинова) ва Айгюл Багь­риева (11-нчи клас, ёлбашчысы – Ругьаният Мусаева) 2-нчи ерлеге ес болдулар.

«В зеркале истории» деген конкурсда Къарабудагъгент гимназияны охувчулары Салима Гьажиева (3-нчю клас) ва Амина Абужаева (3-нчю клас) 2-нчи ерлеге ес болду. Ёлбашчысы — Женнет Салаватова.

«Лучший педагог по обучению основам безопасного поведения на дорогах» деген конкурсда Дёргели орта школаны педагог-къурумчусу Магьамматбашир Атагишиев алдынлы ерни алды.

«Основы безопасности жизнедеятельности» предметден экстремизмге къаршы темагъа багъышлангъан дарсны гьазирлевюне гёре Къарабудагъгент гимназияны муаллими Алимолла Мусаев 2-нчи ерни алды.

«22 Республиканская олимпиада по школьному краеведению, посвящённая 100-летию автономии Дагестана» деген конкурсда Къакъашура 1 номерли орта школаны 10-нчу класыны охувчусу Лейла Самадова (ёлбашчысы Муъминат Абсаматова) 2-нчи ерни къазанды.

«Родные языки» деген агъымындан Къарабудагъгент гимназияны охувчусу Айгюл Багьриева (11-нчи клас, ёлбашчысы – Ругьаният Мусаева) 1-нчи ерни алды.

«Педагог-лидер» деген бёлюгюнде Къарабудагъгент гимназияны муаллими Нарипат Гьанипаева 3-нчю ерге ес болду.

«Лучшая педагогическая династия» деген республика конкурсда Къарабудагъгент гимназиядан – Ругьаният Мусаева 1-нчи ерни алды.

«Всероссийский конкурс сочинений -2020» деген конкурсда Къарабудагъгент гимназияны охувчусу Айида Казиева (11-нчи клас, ёлбашчысы – Ругьаният Мусаева) 3-нчю ерге ес болду.

«Без срока давности» деген хабар тизивден бютюнроссия конкурсда гимназияны охувчусу Амина Къурбанова (7 клас, ёлбашчысы – Ругьаният Мусаева) 2-нчи ерге ес болду.

«Республиканский конкурс в сфере противодействия коррупции среди обучающихся общеобразовательных организаций и профессиональных образовательных организаций» деген конкурсда.

Ислам Гьайбуллаев – 3-нчю ерни, (10-нчу клас, Паравул 3 номерли орта школа, ёлбашчысы – Жамилат Тажуева) алды.

«Лучший чтец произведений дагестанских авторов на родных языках» деген конкурсда Гьели орта школаны охувчусу Асият Жаватова 1-нчи ерни алды, 11-нчи клас, ёлбашчысы – Исбаният Арсланбекова;

Губден орта школаны охувчусу Патимат Расулова 1-нчи ерни алды, 11-нчи клас, ёлбашчысы – Зулхужат Абдурагьманова.

Чебышевни олимпиадасында 1-нчи ерни Гьели орта школаны 5-нчи класыны охувчусу Гюлкъыз Къайирбекова алды, ёлбашчысы – Алибек Къайирбеков.

Пифагорну олимпиадасында Гюлкъыз Къайирбекова (5-нчи клас, ёлбашчысы – Алибек Къайырбеков) ва Патимат Магьамматова (5-нчи клас, ёлбашчысы – Аминат Атаева 3-нчю ерлеге ес болду. Олар экиси де Гьели орта школадан.

«Инг яхшы муаллим» деген бютюнроссия конкурсда Зумарият Бийболатова (гимназия) алдынлы ерни алды.

«Родная литература» олимпиадада 1-нчи ерни Къакъамахи орта школаны 9-нчу класыны охувчусу Зарият Багьанова алды (ёлбашчысы – Гюлзагьрат Тайгибова).

«Родной язык» олимпиадада Айида Казиева (11-нчи клас, ёлбашчысы – Зюлфия Мамаева) ва Жамиля Къамалиева (9-нчу клас, ёлбашчысы – Айгьанат Арсланбекова) 2-нчи ерни алды. Экиси де гимназияны охувчулары.

3-нчю ерге Гьели орта школаны охувчусу Жаминат Абдусаламова (10-нчу клас, ёлбашчысы – Хадижат Мугьажирова) ес болду.

«Технология» олимпиадада Къурбуки орта школадан 11-нчи класны охувчусу Нурмагьаммат Зайналов 1-нчи; 9-нчу класны охувчусу Магьамматмурат Жаппаров (ва 9-нчу класны охувчусу Умар Умаров 2-нчи ерлеге ес болдулар. Уьчюсюню де ёлбашчысы – Нюрмагьаммат Нюрбагьандов.

Эсгерилген олимпиадада Гьели орта школаны охувчулары Айгъази Жанибеков (10-нчу клас) ва Имам Хосаров (9-нчу клас) 1-нчи ерге ес болдулар. Оланы ёлбашчысы – Абсамат Атавумов. Олай да, Манасгент орта школаны охувчусу Нюрьяна Салагьбекова (11-нчи клас, ёлбашчысы – Зайира Салагьбекова) 1-нчи ерни алды.

Газетде сёйлейгенимден пайдаланып, республика ва район оьлчевлерде оьтгерилген конкурсларда ва олимпиадаларда алдынлы ерлеге ес болгъан охувчуларыбызны ва выпускниклерибизни, оланы муаллимлерин къутлама сюемен. Гележекде дагъы да уллу уьстюнлюклеге етишмекни ёрайман.

- Алибек Къайирбекович, бизин булан лакъырлашма гелгенигиз саялы, сизге баракалла. Редакцияны коллективи районну билим берив идараларыны бары да къуллукъчуларын етишип гелеген янгы охув йыл булан къутлайбыз. Районну бары да школаларында билимли охувчулар, пагьмулу ва бажарывлу педагоглар гюн сайын артмакъны ва оьрлюклеге етишмекни ёрайбыз.

- Савболугъуз! Сизге де баракалла!