Меню
16+

Сетевое издание «Будни района»

20.08.2021 09:38 Пятница
Категории (2):
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Маданият министри районда

Автор: Багьавутдин Самадов

ДР-ни маданият министри Зарема Бутаева август айны 17-нде, талатгюн, иш сапар булан Къарабудагъгент районда болду. Ону инг башлап оьзюню иш кабинетинде районну гьакимбашы Магьмут Амиралиев къабул этди. Сонг олар район администрацияны бёлюклерини ва район Жыйыныны депутатлары булан районну ичиндеги бир нече юртунда болдулар ва шо юртларда мекенли кюйде ремонт этилген ва янгыртылгъан маданият ожакълагъа оьзлени тергевюн этдилер.

Шоллукъда, ДР-ни маданият министри Къарабудагъгент районну башчысы Магьмут Амиралиевни узатыву булан инг башлап Къакъашура юртну онгарылгъан ва янгыртылгъан маданият къаласына бардылар.

Гьюрметли къонакъланы Къакъашура юртну башчысы Уллубий Билалов, юрт администрацияны жаваплы къуллукъчулары, олай да маданият идараны ёлбашчысы ва оьзге ишчилери майданчасыны алдында исси кюйде къаршыладылар.

Юртну башчысы ва маданият къаланы ёлбашчысы районну гьакимбашына ва маданият министрге янгыртылгъан маданият ожакъдан экскурсия этдилер. Демек, олар къаравчулар олтурагъан залгъа, шо залны сагь­насына, бинаны ичинде ерлешген эл уьйренив музейге ва китапханагъа оьзлени тергевюн бакъдырдылар.

Белгили кюйде, 2021-нчи йылны башында Къакъашура юртда «Маданият» деген федерал милли проектге гёре онгарылгъан ва ремонт этилген маданият къала халкъны ихтиярына пайдаландырывгъа берилген эди. Гертилей де, коронавирус аврувну яйылывуна да къарамайлы, 2020-нчы йылны боюнда Къакъашурадагъы маданият къала онгарылды ва танылмасдай янгыртылды.

ДР-ни маданият министри Зарема Бутаева оьзю ёлбашчылыкъ этеген министерликни табилигине гиреген идараны ишине айрыча тергев берегени ону къуллукъчуларына инамлыкъ тувдурмай болмай.

Шо сапарда ва тергев болдурувда республиканы маданият министри этилген янгыртывлагъа ва ремонт ишлеге рази экенлигин айтгъан сонг, бу йылны боюнда маданият ожакъгъа та­рыкъ-герек къураллар, согъув милли алатлар заказ этмеге ва шоланы гечикдирмейли алмагъа таклиф этди.

Къакъашура юртдан сонг, Зарема Бутаева ва Магьмут Амиралиев бырынгъы Губден юртгъа оьзлени иш сапарын узатды. Айтагъаным, Губденде янгы маданият къала къурулмагъа гёз алгъа тутула. Олар шо маданият ожакъны къурулувуна тергев этдилер.

Гьюрметли къонакъланы юртгъа гирип барагъан ерде Губден юртну башчысы Осман Жалилов ва оьзге жаваплы къуллукъчулар къаршыладылар.

Олар маданият къала къурулагъан хас майданчагъа ёл салдылар. Гертилей де, маданият ожакъ булан эсгерилген майданчада янгы яшлар баву да къурулмагъа гереклигин районну гьакимбашы Магьмут Амиралиев ачыкълашдырды.

Шо ерде ДР-ни маданият министри къурулуш бирлешивню ёлбашчысына маданият къаланы оьз болжалында къуруп битмеге таклиф этген сонг, ону проект-чыгъыш хас документлерине тергевюн болдурду. Олай да, районну башчысы ва маданият министри маданият ожакъгъа тарыкъ-герек къураллар, согъув милли алатлар алмакъны гьайында турмакъны юртну башчысына таклиф этдилер.

– Губден юрт учун къурулагъан маданият къаланы умуми майданы 600 квадрат метр болажакъ. Шо маданият къаланы къаравчулар учунгъу залына 200 адам олтурмагъа болажакъ.

Сонг да, шу майданчада комплекс къайдада маданият къала булан янаша яшлар баву да къурулажакъ. Демек, социал къурулушлар учун айрыча хас майданча гёрсетилген. Шу майданчаны айланасында гележекде янгы яшавлукъ микрорайон болажакъ», – деп тамамлады районну гьакимбашы Магьмут Амиралиев ДР-ни маданият министри Зарема Бутаева булангъы иш сапарында.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

3