Байрагъыбызны байрам гюню
Август айны 22-нде Россияда Россия Федерацияны Пачалыкъ байрагъыны гюню белгилене. Шо гюн 1994-нчю йылны август айыны 20-сындагъы РФ-ни Президентини «О Дне Государственного флага Российской Федерации» деген къарарына гёре белгилене.
РФ-ни биринчи Президенти Борис Ельцин 22-нчи августда 1712 номерли Указгъа къол салгъан ва уьч тюслю акъ-гёк-къызыл байракъ Пачалыкъны байрагъы деп билдирилген.
1991-нчи йылны август айыны 22-нде РСФСР-ни Оьр Совети «Об официальном признании и использовании Национального флага РСФСР» деген къарар къабул этген, шо къараргъа гёре хас закон булан янгы пачалыкъ белгилер къабул этилгинче, тарихли уьч тюслю Россияны байрагъы – Россия Федерацияны Милли байрагъы деп гьисапланажакъ деп билдириле.
Сонг РФ-ни Президенти Владимир Путин 2000-нчи йылны декабр айыны 20-нда гимн, герб ва байракъ белгилерибиз гьакъдагъы федерал Конституциягъа къол салгъан. Уьч тюслю байрагъыбыз оьтгерилеген пачалыкъ байрамларда, спорт ярышларда, тюрлю гёрмекли ёлугъувларда, чараларда уллу гьюрмет булан гётериле.
Тек Россияны Пачалыкъ байрагъыны тарихи хыйлы алдан башлана.
Россияны триколоруну бек бай тарихи бар. Огъар 300 йылдан да къолай бола.
Россияны Пачалыкъ байрагъы биринчилей Алексей Романов пачаны заманында къолланма башлангъан. Эсгерилген байракъны ону уланы I Пётр пача 1705-нчи йыл тюрлю сатыв-алыв аралыкъларда, сув гемелерде къолламагъа герек деп къарар къабул этген.
Амма уьч тюслю байракъ Пачалыкъ Милли байракъ гьисапда 1870-нчи йылларда къолланма башлангъан.
Тек I Пётр пачадан сонг орус асгерлерде сари ва къара тюслер кёп къолланма башлангъан. Император II Александр 1858-нчи йылны июн айыны 23-нде Россия Империяны Пачалыкъ байрагъы деп къара – сари – акъ тюслери булангъы байракъны белгилеген. Шо байракъ 1883-нчю йыл болгъунча къоллангъан. 1883-нчю йылны май айыны 10-нда III Александр Пачалыкъ байракъны тюслерин алышдырып, янгыдан акъ- гёк –къызыл этмеге буйрукъ берген.
Хас кюйде шо тюслю байракъ Россияны Пачалыкъ байрагъы деп 1896-нчы йыл II Николайны коронациясыны алдында законлу кюйде къабул этилген.
1918-нчи йылны апрель айында Яков Свердловну сиптесине гёре уьч тюслю байракъ инкъылапны къызыл байрагъына алышдырыла. Совет девюрде (70 йылланы узагъында) РСФСР-ни байрагъыны тюсю къызыл кюйде тургъан.
Гьалиги уьч тюслю байрагъыбыз миллетибизни герти белгиси болуп токътагъан. Пачалыкъ байрагъыбызны хас гюнюнде уьлкебизни бары да ерлеринде уллу шатлыкълар, байрам чаралар оьтгериле.
Шо буса биз, россиялылар, уьч тюслю байрагъыбызгъа уллу гьюрмет этегенибизни ачыкъ эте.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
