«Спортну ва савлукъну сайла»
Къарабудагъгент юртну баш китапханасында «Спортну ва савлукъну сайла» деген баш булан хас китап выставка оьтгерилди. Китап выставкада спортну гьар тюрлю жураларыны гьакъында айтылагъан китаплар ва журналлар тизилген эди. Олай да, бизин белгили спортчуларыбызгъа багъышлангъан макъалалар язылгъан китаплар да тахчагъа салынгъан эди.
Баш китапханачы Азинат Пашаеваны сёзлерине гёре, выставкагъа салынгъан китаплардан охувчулар спортну гьар тюрлю жураларыны гьакъында оьзлеге генг кюйде маълуматлар алмагъа бола. Олай да, спорт булан профессионал кюйде машгъул болагъан адамлагъа китапларда тарыкълы баянлыкълар берилгенин ол аян этди.
«Гьар йыл август айны 2-нчи сонгугюнюнде Россияда Физкультурникни гюню белгилене. Шо байрам гюн спортну сюеген бары да халкъны къуршайгъан ва бирикдиреген чаралар оьтгериле. Бизин районубузда, олай да, китапханаларда ва маданият ожакъларда юрюлеген чараларда спортну темасы айрыча ер тута. Бугюн-тангала оьзлени хас касбу байрамын оьтгереген спорт тармакъны бары да къуллукъчуларын къутлайбыз, олагъа спорт ярышларда оьрлюклер ва уьстюнлюклер ёрайбыз», — деди оьзюню сёйлевюнде администрацияны маданият ва туризм бёлюгюню ёлбашчысы Найида Мурзаева.
Чараны барышында сёйлеген администрацияны спорт бёлюгюню алдынгъы касбучусу Нюрмагьаммат Агъабеков спорт тармакъда оьзюню оьрлюклери ва уьстюнлюклери гьакъда айтгъан сонг, районлулагъа савлугъуну гьайын этмеге ва ону беклешдирмеге оьзюню таклифлерин берди.
Олай да, чарада шаир ва журналист, район администрацияны прес-къуллугъуну ёлбашчысы Багьавутдин Самадов сёйледи. Ол оьзюню сёйлевюнде Токиода оьтгерилген Олимпиадада алдынлыкъны алгъан россиялы спортсменлени гьакъында айтгъан сонг, Олимпиаданы чемпионлары Завур Угуевге ва Альберт Батыркъазиевге багъышлангъан оьзюню шиъруларын охуду
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
