Магьмут Амиралиев: “Аврувну янгыз вакцина токътатма бола”

Къарабудагъгент район больницаны баш врачыны поликлиника ишлерине къарайгъан орунбасары Гюлженнет Расулова районлуланы вакцина этдиривю гьакъдагъы сёзлерине гёре, бу йыл 12-нчи августгъа коронавирус инфекциягъа къаршы 4951 адам вакцинаны этдирген, шоланы 1700-ю – район билим берив ва башгъа идараланы къуллукъчулары.

Олай да, 642 медицина къуллукъчулар да иммунизациядан оьтген. Район администрацияны ва юрт администрацияланы 171 къуллукъчусу да вакцина этдирген. Юртлардагъы ишлеге бармайгъан адамлардан да 1500-ю вакцина этдирген. Шо буса районлулар вакцина этмеге башлагъанын, ­оьзлени ва агьлюсюндегилени аврувдан къорумакъны гьайын этегенин англата.

Къарабудагъгент ЦРБ-ни вакили билдиреген кюйде, ихтияр якълав ва халкъланы къуллукъларын кютеген къурумланы, демек тюкенчилер ва башгъалары, олай да 60 йылдан ­оьтген тюрлю «хронический» аврувлары булангъылар вакцина этдирмеге бек аз геле, демек, алгъасамай.

Атдагъы жума район больницагъа 3600 доза вакцина гелтирилген. Ондан алда дагъы да – 4820 доза гелтирилген эди.

Районлуланы вакцина этдирегени гьакъда айта туруп, Магьмут Амиралиев районлуланы вакцина этдиривге актив кюйде къуршалмагъа чакъырды.

«Вакцина бек яман ва авур коронавирус аврувну алдын алмагъа, токътатмагъа бола. Шону бары да халкъ англама тарыкъ. Биз гёрюп турагъаныбыз йимик, аврув гюнден гюн «жагьил бола», гючлене. Больницада 100 адамгъа гьазирленген ятыв ерлерде бугюнлерде 93 адам ятгъан. Демек, авруйгъанлардан больница тола бара. Олагъа къарама да, къуллукъ этме де бек къыйын, юреклер ярыла.

Гьюрметли районлулар, мен сизин врачлар айтагъангъа тынглама, вакцина этдирмеге чакъыраман», — дей ол.