Аврув табулмагъан

Август айны 10-нда болгъан район администрацияны аппарат жыйынында Къакъашурада “сибирская язва” инфекция аврувну гьакъындагъы масъалагъа къаралды.

Чараны районну башчысыны биринчи орунбасары Ибрагьим Абдулмежитов ачды ва юрютдю. И. Абдулмежитов залдагъылар булан саламлашып битген сонг районда “сибирская язва” инфекция аврувну арагъа чыгъыву ва ону алдын алыв чаралагъа байлавлу маълумат берме Къарабудагъгент ветеринар управлениесини ёлбашчысы Исмайыл Гьажиевни трибунагъа чакъырды.

Исмайыл Гьажиев” “Къа­къашурада “сибирская язва” аврувдан уллу ва увакъ мал эт булан алыш-бериш этеген Н.Татаев авругъаны белгили болгъандокъ, тергев, ахтарыв ишлер оьтгердик. Нюрмагьаммат Татаев уллу мююзлю гьайванны (тана) фермер Атай Расуловдан сатып алгъан. Бу фермадагъы гьайванлар тергевлерден чыкъгъан. Районда лап яхшы, зооветеринар талапланы тюз юрюте. Уьстевюне, тананы Н. Татаев оьзю соймагъан, башгъа гишиге сойдургъан, этин Манас базарда сатгъан. Биз билеген кюйде районда дагъы “сибирская язва” инфекция аврувдан авруйгъан бар, докътурлагъа баргъан деген сёзню эшитмегенбиз”,-деди И.Гьажиев.

Роспотребнадзорну касбучулары Н.Татаев сойгъан гьайванны гёнюн, оьзге алагъожасын инфекция аврувгъа тергемек учун лабораториягъа йиберген. Са­тылгъан гьайван “сибирская язва” инфекция аврувдан аврумай болгъан деп токъташдырылгъан.

Нюрмагьаммат Татаев “сибирская язва” аврувну къайдан алма бола деген сорав арагъа чыгъа. Ону айтывуна гёре ол оьзюню абзар ягъа участкасында нас алагъожаны жыя туруп айланагъанда, ону къолу чокъула. Чокъув заман гетген чакъы, сав болмай, ирин жыя. Н. Татаев бармагъыны уьстюндеги ирин чыгъыв булан Къакъашура ветеринар участканы заведующийи К.Хиясовгъа ёлукъгъан. Ол да бу масъала булан докътургъа ёлукъма таклиф этген.

Бир зат ачыкъ, “сибирская язва” инфекция аврув гьайвандан таба юкъмагъан.

Шогъар да къарамайлы, район ветеринар управлениесини касбучулары “сибирская язва” аврувну алдын алмакъ муратда Къакъашура юртгъа гиреген, чыгъагъан ерлерде постлар токътагъан. Юртдан уллу ва гиччи мююзлю гьайванланы этин чыгъарма, гийирме къоймай.

Исмайыл Гьажиев районда “сибирская язва” аврувну алдын ала туруп, 41771 уллу мююзлю, 85625 гиччи мююзлю, 281 ат инфекциягъа къаршы вакцина этилгенин эсгерди.

Бу йыл Къакъашурада инфекция аврувгъа къаршы 2638 уллу, 1500 гиччи мююзлю гьайванлар вакцина этилген.

И.Гьажиев оьзюню сёйлевюн узата туруп, бугюнге бир йыллыкъ, алты айдан уллу 2139 уллу мююзлю, шоланы 1662-сине абзар уруп айланып вакцина этилген. Ондан къайры да, уьч затгъа ва 2046 гиччи мююзлю гьайванлагъа вакцина этилген. Шо ишлер бугюнлерде де узатыла. Оратор оьзюню сёзюн тамамлай туруп, ДР-ни ГБУ «Дезинфекция» къуллугъуну касбучуларын чакъырып, ООО «Манас» ярмарканы территориясы дезинфекция этилгенин эсгерди.

Чарада районну ветеринар управлениесини ёлбашчысы Исмайыл Гьажиевге “сибирская язва” инфекция аврувгъа, ону алдын алывгъа байлавлу кёп соравлар берилди.

Исмаил Гьажиев гьар берилген соравгъа гёре тындырыкълы ва мукъуятлы жаваплар къайтарды.