Сююв ва сююнч

Татывлу ва къатты агьлюде сююнч де, шатлыкъ да яшай. Бизин барыбыз да учун агьлюдегилени сюювю ва сююнчю бек агьамиятлы. Гьалиги девюрде агьлю къуруп яшама сюймейгенлени санаву арта барагъаны саялы, адамланы арасында герти гьислер кемимесин деп, Агьлюню, сюювню ва аминликни гюнюн байрам гьисапда белгилеме башлады. Шо гюн агьлюдегилер бир-бирин къутлай, агьлю насип ёрай, байрамны шатлыкъда белгилей.

Агьлюню, сюювню ва аминликни гюню байрам гьисапда 2008-нчи йылда, демек, «Агьлюню йылында» белгиленме башлады. Агьлю яшгъа да, уллугъа да якълав болуп токътай, олагъа аналыкъны ва аталыкъны насибин савгъат эте.

Татывлу, насипли агьлюде тувгъан, оьсген яшлар бизин уьлкебизни уьстюнлюклеге элтип, ону ­оьсювюне айрыча таъсир эте. Агьлю къыйынлыкъланы ва авурлукъланы, тюрлю масъалаланы бирче чечип, сюювню, гертиликни сёнме къоймай сакълап бажара.

Шолай агьлюлер бизин Къарабудагъгент районда кёп бар. Уьч-дёрт ва дагъы да кёп яшны тарбиялап ¬оьсдюреген, олагъа билимли болма кёмек этеген ата-ана, озокъда, макътавгъа лайыкълы. Агьлю, аналар ва яшлар гьаманда пачалыкъны якълавуну тюбюнде.

Ачыкълашдырып айтсакъ, артдагъы йылланы ичинде агьлюлени социал якъдан къорумакъ ва сакъламакъ учун РФ-ни Президенти хыйлы таклифлер берген. Демек, яш агьлюлеге кёп кёмек болдура.

3 йылдан 7 йыл тамамлангъынча, агьлюдеги яшлагъа 7 мингден 10 минг манатгъа ерли акъча бериле. Олай да, ярты агьлюлерде (атасы яда анасы оьлген, тас болгъан яда айрылгъан) яшайгъан яшлагъа да бу йылны июль айны 1-нден башлап, 5 минг манатдан къолай акъча берилежек.

Яшланы тарбиялав, оланы гьайын этив ата-ананы инбашына тенг бёлюне. Ишлеп болагъан чагъына етишген яшлар буса ата-анасына къарама, оланы гьайын этмеге борчлу.

Агьлюню гюнюне багъышлангъан байрамны «За любовь и верность» эсделик медалы да бар. Медальда сюювню белгиси гьисапланагъан ромашка чечек бар.

Бары да районлуланы агьлюню, сюювню ва аминликни гюню булан къутлай туруп, сизге татывлукъ, аминлик ва парахат яшав ёрайбыз.