Меню
16+

Сетевое издание «Будни района»

09.07.2021 09:13 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Оперштаб оьтгерилди

Автор: Район администрацияны прес-къуллугъундан

Алдагъы гюнлерде район администрацияны башчысыны ишчи кабинетинде коронавирус аврувну алдын алмакъ учун къурулгъан хас оператив штабны генгеши оьтгерилди. Генгешни ишинде оперштабны уьюрлери барысы да оьзлени ортакъчылыгъын болдурдулар.

Оперштабны ачгъан ва юрютген районну башчысы Магьмут Амиралиев Къарабудагъгент район больницаны баш врачы Расул Гьиравовгъа коронавирус аврув булангъы гьалны гьакъында баянлыкълар бермеге чакъырды.

Р.Гьиравовну сёзлерине гёре, авруйгъан 56 адамны арасында 8-и – авур, 32-си – орта ва къалгъанлары енгил кюйде авруй. Авур авруйгъан 8 адамны арасында 3-юсю жагьил адамлар экенлиги, коронавирус аврув яш ва жагьил чархны да аямайгъанын ачыкълашдыра деп, баянлыкълар берди КЦРБ-ни баш врачы. Ол эсгерген кюйде, буссагьат авруйгъанлар – аслу гьалда дёргелилилер. Олар больницада 10 бар.

Оьзюню сёйлевюн тамамлай туруп, Къарабудагъгент ЦРБ-ни баш врачы терапия бёлюкню яртысы коронавирус аврув булан авруйгъанлардан толгъанын аян этди.

Оперштабны барышында ону уьюрлери гётерилген масъалагъа гёре оьзлени ойларын айтды ва таклифлерин берди.

Оперштабны генгешин тамамлай туруп, ону ёлбашчысы районну гьакимбашы Магьмут Амиралиев къабул этилген къарарны оперштабны уьюрлерине ачыкъ этди.

Шоллукъда, июль айны 5-нден тутуп, тойлар ва оьзге мажлислер оьтгерилеген банкет заллар, яшлар ва яшёрюмлер жыйылагъан клублар оьзлени ишин токътатажакъ.

Санатория – курорт ва къонакъюй идараларда ял алмагъа ва савлугъун беклешдирмеге гелегенлени вакцинасы болмагъа герек. Яда буса шолай адамланы коронавирус инфекциягъа къаршы хас “антителалары” болмагъа тарыкъ.

Олай да, жамият транспортда, сатыв-алыв юрютеген тюкенлерде , аптеклерде, дин идараларда ва оьзге жамият къурумларда маска режимни гючлендирмекни тапшурду.

Къарабудагъгент райондагъы МВД-ни ва Роспотребнадзорну территориал бёлюгюню къуллукъчулары булан бирче район администрацияны янында иш гюплер (группа) къурула. Шо хас гюплер оьзлени оьтгереген чараларында оьрде эсгерилген идараланы къуллукъчуларыны вакцина этилгенин тергемеге ихтияры бар. Шолай адамланы сертификаты яда коронавирус аврувгъа къаршы антителалары болмагъа тарыкъ.

Олай да, шо чараланы барышында халкъгъа аш биширеген идараларда эпидемия аврувгъа къаршы чаралар юрюлеми яда тутуламы тергележек.

Оперштабны ишин тамамлай туруп, районну башчысы Магьмут Амиралиев халкъны арасында вакцинаны гьакъында генг кюйде англатыв иш юрютмекни тапшурду.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

1