Меню
16+

Сетевое издание «Будни района»

09.07.2021 09:17 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Аслу масъала – вакцина этдирмек

Автор: Багьавутдин Самадов

Гьаманда йимик, талатгюн район администрацияны аппаратыны гезикли генгеши оьтгерилди. ­Генгешни ишинде район администрацияны жаваплы къуллукъчулары булан бирче юртланы башчылары да оьзлени ортакъчылыгъын болдурдулар.

Генгешни ачгъан ва юрютген районну башчысы Магьмут Амиралиев бугюн-буссагьат арабызда бар лап да аслу ва итти масъаланы – коронавирус аврувну алдын алывну гьакъында мекенли кюйде айтды. Демек, докторлар береген баянлыкълагъа гёре, коронавирус аврувну яйылывун токътатмакъ ва алдын алмакъ учун халкъ вакцина этмеге герек.

Оьтгерилген генгешде аслу докладчы гьисапда Къарабудагъгент район больницаны баш врачы Расул Гьиравов маълуматлар булан сёйледи. Ол берген маълуматлагъа гёре, районубуз умуми алгъанда 3600-ден артыкъ вакцинаны оьлчевюн (доза) алгъан. Шоланы 3300-ден артыгъы адамлагъа этилген.

Болса да, районну ичинде этилмеге тарыкълы адамланы бугюнге 10 проценти де вакцина этилмегени гьакъда айтгъан сонг, Р.Гьиравов аврувланы къабул этмек учун больницада 70 адамгъа койка – ер онгарылгъанын ачыкъ этди. Шоланы 54-сюнде буссагьат авруйгъанлар бар. Шо авруйгъанланы 8-и – авур гьалда. Шо авур гьалдагъыланы 3-юсю жагьил адамлар деп, баянлыкълар берди Къарабудагъгент район больницаны баш врачы Р.Гьиравов.

Район больницаны баш врачыны сёзлерине гёре, вакцина этилген 3300 адамдан янгыз 2-си коронавирус аврувну енгил къайдасы булан авругъан. Олай да, бугюнлерде район больницагъа дагъы да вакцинаны 300 оьлчевю гелмеге гёз алгъа тутулгъанын айта туруп, Р.Гьиравов оьзюню сёзлерин тамамлады.

Генгешде районну гьакимбашы Магьмут Амиралиев район администрацияны бир-бир бёлюклерине ва жаваплы къуллукъчуларына эпидемия гьалны яхшылашдырмакъ ва ёрукълашдырмакъ учун чаралар гёрмеге тапшурувлар берди.

Ачыкълашдырып айтсакъ, район администрацияны экономика, территориал оьсюв ва далапчылыкъ бёлюгюне сатыв-алыв юрютеген тюкенлеге, аптеклеге, аш биширеген хас идаралагъа маска режимни ва Роспотребнадзорну талапларын яшавгъа чыгъармакъны таклиф этди.

Олай да, М.Амиралиев район администрацияны башчысыны орунбасары М.Зугьумовгъа жамият транспортда маска гиймекни къатты кюйде буварды.

Районну башчысы М.Амиралиев администрацияны маълумат сиясат управлениесине масса маълумат къуралларда, социал байлавлукъда генг кюйде англатыв ишни юрютмекни тапшургъан сонг, районубузда бар белгили врачланы вакцина этив гьакъда оьзлени чакъырывларын бермекни таклиф этди.

Генгешни тамамлай туруп, районну башчысы М.Амиралиев бирдагъы керен районну ичиндеги бары да юртланы башчыларына ва имамларына, къурумланы ва идараланы ёлбашчыларына, олай да депутатлагъа, абурлу тамазалагъа, спортсменлеге, маданият къуллукъчулагъа, жагьиллеге коронавирус аврувну алдын алмакъ учун бек белсенип чалышмагъа , вакцина этив гьакъда англатыв иш юрютмеге тапшурду.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

4