Меню
16+

Сетевое издание «Будни района»

30.07.2021 08:44 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Яшавлукъ-коммунал ишлер юрюле

Автор: Багьавутдин Самадов

Бизин районубузну юртларында артдагъы йылланы узагъында хыйлы ишлер этилген: янгы школалар, яшлар бавлары къурула ва янгыртыла, адамлар ял алагъан бавлар янгырыла, ёллар тегишлене ва шолагъа асфальт салына, газлашдырыв ва ярыкълашдырыв быргъылар тартыла, сувланы масъаласы да астаракъ чечиле юрюй.

Яшавлукъ-коммунал тармакъда да ерли юрт администрацияланы ёлбашчылыгъы булан кёп ишлер этилген. Айтагъаным, трасформаторлар алышдырылгъан, ярыкълар учун багъаналар салынгъан, сув быргъылар янгыртылгъан ва дагъы да оьзге тюрлю яшавлукъ-коммунал ишлер этилген.

Шолай тарыкълы ишлер районубузну къайсы юртунда да юрюлюп тура. Шо ишлеге, озокъда, юрт Жыйынланы депутатлары ва жамият къуршала, кёмеклеше. Айрокъда, шолай жамиятны ишлерине оьсюп гелеген наслубуз къошулагъаны ва къуршалагъаны, оланы загьмат ва коллектив булан тарбиялайгъаны да белгили. Шолай болмагъа да тийишли. Демек, алдынгъы заманларда булкъалар булан жамиятны ишлери уьстюнлю кюйде чечиле гелген.

Уллубийавулну депутатлары халкъ учун оьзлени къолундан гелеген кёмекни болдура юрюй. Жамият бирлешип иш этмек уллубий­авуллуланы къанында бар десек, башгъа къопдурув болмас.

Масала, алдагъы гюнлерде Къарабудагъент РЭС-ни жаваплы къуллукъчулары булан бирче район Жыйыныны депутаты Казбек Ибеевни гьаракаты ва гьай этивю булан Алимирзаеваны аты къоюлгъан ва “Дербентская” орамларда ток телбагъаналар ва трансформатор алышдырылды.

Шо ишге ерли жагьиллер ва яшёрюмлер къуршалгъаны мен оьрде эсгерген рагь­мулу ва яхшы хасиятланы исбатлай.

Юртну администрациясы ишге къуршалгъанлагъа разилигин билдире.

Олай да, алдагъы гюнлерде Губден юртда да шолай пайдалы ишлер оьтгерилди. Айтагъаным, 4 янгы трансформатор салынды. Шоллукъда, ярыкъны къоллавчулагъа бир хыйлы яхшы болду. Артдагъы вакътилерде бары да халкъ ярыкъ булан къолланагъан алатланы ва къуралланы кёп къоллайгъан болгъан. Шо саялы да, ярыкъны гючю болмаса, шо алатланы ишлетмеге болмай.

Къарабудагъгент РЭС-ни баянлыкъларына гёре, ярыкъ­ береген «Рассвет» подстанцияны онгармагъа ва янгыртмагъа гёз алгъа тутулгъан. Демек, шо подстанцияны да онгарса, Губденде яшайгъан ярыкъны къоллавчулагъа ярыкъны гючю хыйлы артажагъы ачыкъдан да ачыкъ.

Районубузну район центры – Къарабудагъгет юртда да гьар гюн иш юрюлюп тура десек, башгъа янгылыш болмасбыз. Айтагъаным, юртну администрациясыны сиптечилиги булан сув быргъылар янгыртыла, ёлну ва оьзенни боюндагъы чёп ва нас-алагъожалар тазалана ва тайдырыла ва дагъы да кёп иш юрюле.

Муна алдагъы гюнлерде Гьасан Абдуллаевни аты къоюлгъан орамны сув быргъылары янгыртылды. Олай да, алдагъы гюнлерде Жумамежитге барагъан ёлну бир гесегине асфальт салынды. Шолай ишлер гьар гюн йимик оьтгериле.

Озокъда, этилген шо ишлеге юртланы халкъы къуршалгъанын айтмагъа тарыкъ. Депутатлар, жагьиллер, далапчылар бирлешип, жамияты учун уллу пайдалы ва тарыкълы ишлени юрюте.

Районубузну ичиндеги бары да юртларда юрюлеген шу ишлер халкъны яшавлукъ-коммунал шартларын яхшылашдыражагъына инамлыкъ тувдура.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

4