Меню
16+

Сетевое издание «Будни района»

02.07.2021 09:07 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

«Язбашда» сезон ачылды

Автор: Багьавутдин Самадов

Гьаманда йимик, гьар йыл июнь айны 24-нде «Язбаш» деген сакъат-ампутантланы ял алагъан хас базасында яйлыкъ ял алыв сезон ачыла. Шо шатлы чарагъа байлавлу болуп, гёзел денгиз бойда байрам оьтгериле. Шоллукъда, июнь айны 24-нде «Язбашда» ял алыв сезонну ачылывуна багъышланып чара оьтгерилди. Чараны барышында ДР-ни загьмат ва социал оьсюв министрини орунбасары Абдулкерим Абдуллаев, шо министерликни социал бёлюкге жаваплы бёлюгюню начальниги Жабрайыл Дайзиев, Р.Гьамзатовну атындагъы фондну президенти Гьабибат Азизова, «Билайн» байлавлукъ бирлешивню Темиркъазыкъ Кавказдагъы бёлюгюню генеральный директору Авусалитдин Магьамматов, Къарабудагъгент район администрацияны башчысыны орунбасары Жалалутдин Жама­лутдинов, «Язбашны» уьюрлери ва чакъырылгъан къонакълар оьзлени ортакъчылыгъын болдурдулар.

Чакъырылгъан къонакълар ва «Язбашны» уьюрлери ял алагъан базагъа жыйылгъан сонг, яйлыкъ сезонну ачылывуна багъышлангъан шатлы чара башланды. Чараны юрютювчю, район администрацияны социал ва яшёрюмлени сиясатына къарайгъан бёлюгюню ёлбашчысы Гюлжанат Темирова «Язбаш» деген сакъат-ампутантланы жамиятыны чалышыву гьакъда баянлыкълар берген сонг, сёзню район администрацияны башчысыны орунбасары Жалалутдин Жамалутдиновгъа тапшурду.

- «Язбаш» деген сакъат-ампутантланы жамиятыны ёлбашчысы Али Мусаев оьзюню ишин оьр къурумлу даражада юрюте ва сакъатланы гьар даим гьайын эте. Ол конкурсларда ортакъчылыгъын болдурагъаны ва грантлагъа ес болагъаны мени сёзлеримни гертилигин исбатлай.

Районну башчысы Магьмут Амиралиев «Язбаш» деген сакъат-ампутантланы жамиятын ва ёлбашчысын 2021-нчи йылны яйлыкъ ял алыв сезонуну ачылыву булан къутлай туруп, дагъы да оьрлюклер ёрай, — деп айтгъан сонг, районну администрациясыны атындан огъар Баракалла кагъыз тапшурду.

Олай да, оьтгерилген чараны барышында оьзлени сёйлевлери булан Р.Гьамзатовну атындагъы фондну ёлбашчысы Гьабибат Азизова, «Билайн» деген байлавлукъ бирлешивню Темиркъазыкъ Кавказдагъы бёлюгюню генеральный директору Авусалитдин Магьамматов, Уллубийавул юртну башчысы Руслан Абуев ва оьзге ёлдашлар сёйледилер. Олар оьзлени сёйлевлеринде «Язбаш» жамиятны чалышыву ва ону ёлбашчысы Али Мусаевни гьаракатчылыгъы гьакъда айтдылар ва ­оьзлерден болагъан кёмегин этежегин ташдырдылар.

Оьтгерилген чараны Къарабудагъгент ЦТКНР-ни йыравлары оьзлени къурч макъамлары ва йырлары булан безендирди. Сакъат-ампутантланы юреклери хош болагъанына, гёнгю ачылагъанына къарап, яшавну маънасы барлыгъына къуванмайлы болмай эди.

Оьтгерилген шатлы чараны ахырында «Язбаш» деген сакъат-ампутантланы жамиятыны ёлбашчысы Али Мусавге сёз берилди.

- Чакъырылып гелген гьюрметли къонакълар ва бизин «Язбаш» жамиятыбызны уьюрлери!

Гьаманда йимик, гьар йыл июнь айны 24-нде бизин базабызда, гёзел денгизни ягъасында ял алывну сезону ачылагъанына багъышланып шатлы чара оьтгериле. Бизин шу шатлыгъыбызда районубузну ёлбашчылары, республика идараланы жаваплы къуллукъчулары, рагьмулу юрекли ва чомарт къоллу далапчылар ва сиптечилер, дос-къурдашыбыз оьзлени ортакъчылыгъын ва кёмегин болдура.

Шоллукъда, РФ-ни Президентини грантларыны фондуну ёлбашчыларына, ДР-ни Халкъ Жыйыныны депутаты Магьамматсолтан Магьамматовгъа, Къарабудагъгент районну гьакимбашы Магьмут Амиралиевге, «Билайн» деген байлавлукъ бирлешивню Темиркъазыкъ Кавказдагъы бёлюгюню генеральный директору Авусалитдин Магьамматовгъа ва оьзге дагъы да ёлдашлагъа бизге кёмегин болдургъаны саялы, гьакъ юрекден разилигибизни ва баракаллабызны билдиребиз, — деп «Язбашны» ёлбашчысы Али Мусаев оьзюню сёзюн тамамлады.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

5