Президентни тувра берилиши
Алданокъ хас маълумат къуралларда билдирип тургъаны йимик, июнь айны 30-нда заввал тюшде Россия Федерацияны Президенти Владимир Путин уьлкени ватандашларыны соравларына тувра берилишде жаваплар берди.
Шо гюнгю тувра берилишде уьлкени гьакимбашына гьар тюрлю тармакълардан эки миллиондан да къолай соравлар берилген. Ватандашлар тувра берилишни вакътисинде де Президентге оьзлени ичинбушдурагъан соравланы берме бола эди.
30-нчу июнда болгъан тувра берилишде В.Путин 68 соравгъа жавап берген.
Ватандашлар РФ-ни Президентине савлукъ сакълав, билим берив, экономика, социал, яшавлукъ-коммунал, табиатны къоруп сакълав, багьаланы гьатдан оьтюп гётериливю ва башгъа кёп тюрлю соравланы берген. Бары да соравлагъа тувра берилишде жаваплар берилмесе де, берилген бир сорав да тергевсюз къалмажагъы гьакъда уьлкени башчысы айтгъан.
Коронавирус ва вакцинаны гьакъындагъы соравлагъа В.Путин:
-Мен борчлу вакцина этдиривге къаршыман. Сиз билеген кюйде, мен борчлу вакцинаны этивню якъламайман. Шо пикирден гьали де таймаман. Шо бир вакътини ичинде коронавирус инфекция аврувну генг яйылывуну алдын янгыз вакцина булан алма бола, — деди.
Президент оьзю де, мюкюр болгъаны йимик, «Спутник V» вакцинаны этдирген.
Коронавирус инфекция аврувну гьакъында айта туруп:
-Регионларда бир-бир къуллукъларда ишлейген ватандашлагъа борчлу кюйде вакцина этдирив законгъа къыйышмай тюгюл. Вакцина булангъы гьалны англамакъ учун, 1998-нчи йылда «Ватандашланы иммунный къорувун якъламакъ» учун къабул этгелген законгъа асасланма бола, — деди В.Путин.
Бу законну экинчи гесегинде эсгерилгени йимик, уьлкени бир-бир регионларындагъы эпидемия гьалгъа гёре, баш санитар врачланы таклифи булан регионланы ёлбашчылары борчлу вакцина этдиривню гийирмеге ихтиярлы.
“Янгы охув йыл нечик башланажакъ?”- деген соравгъа уьлкени башчысы булай жавап берди:
- Россияда янгы охув йыл башланагъан вакътиге эпидемия гьал нечик болажагъын алданокъ айтма къыйын. Башлапгъы класларда охув гьаманда йимик оьтежек, оьр класларда охув процес шо замангъы гьалдан гьасил болажакъ, — деди.
Тувра берилишде ватандашлар уьлкени башчысына сурсат промышленный малланы багьаларыны гьатдан оьтюп гётериливю гьакъда соравлары кёп бар эди. Багьаланы гётериливюн В.Путин коронавирус инфекция булан байлады. Буссагьатгъы вакътиде уьлкеде йыллыкъ инфляция – 5,9%. Ашамлыкъ, къурулуш материалланы багьаларыны артыву гьакъда дюнья базарлардагъы гьал булан байлап сёйледи. Бу йылны тюшюмюн къайтарыв ерлерде масса кюйде башланса, багьалар эниш тюшме герек.
Ватандашлар Президентге берген соравланы арасында юрт хозяйство тармакъны гётеривге, айрокъда топуракъланы асувлу къолламакъ, участкаланы тюшюмлюгюн артдырмакъ учун сугъарыв сув етишмейгенин, къургъакълыкъдан чачывлар гююп, фермерлер уллу зараллар гёрегини гьакъда айтыла эди.
Юрт хозяйствогъа байлавлу соравлагъа жавап бере туруп, В.Путин булай деди:
- Артдагъы йылларда АПК-ны къуллукъчулары къолда эте гелеген уьстюнлюклер къувандырмай болмай. Мен англайман, юрт хозяйствону асувлулугъун дагъыдан-дагъы оьрге гётермек, иш чыгъарывну артдырмакъ учун бек белсенип ишлеме тарыкъ.
Биз бу агьамиятлы тармакъны тергевню тюбюнде сакълайбыз ва кёмек де этебиз, энниден сонг да этербиз. Юрт хозяйствону гётеривде мелиорация агьамиятлы роль ойнай. Гьар йыл мелиорация ишлеге уллу оьлчевлерде акъча маялар гёрсетиле, энниден сонг да гёрсетилежек.
Тувра берилишни барышында берилген соравланы арасында регионларда яшавлукъ-коммунал, школаланы, яшлар бавланы биналарыны ремонт ишлерини, ёлланы бузукълугъу гьакъда да кёп соравлар бар эди. В.Путин ватандашланы соравларына жаваплар бере туруп, прес-центрге гелген бир сорав да тергевсюз, жавапсыз къалмажагъын малим этди.
Тувра берилишде гётерилеген масъалаланы дестине яшавгъа чыгъарма гиришген чиновниклер де болду.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
