Гезикли сессия оьтгерилди

Сессияны ачгъынча, районну ёлбашчысы Магьмут Амиралиев оьзю 19-нчу июнда Москвада оьтгерилген «Бирлешген Россия» деген партияны ХХ-нчы съездинде ортакъчылыкъ этгенин айта туруп, РФ-ни Президенти Владимир Путин россиялыланы яшавун ва турушун яхшылашдырмакъ учун гёз алгъа тутулгъан проектлени ва программаланы гьакъында баянлыкълар берди.

Демек, билим берив, савлукъ сакълав, яшёрюмлени гьайын этив, яшавлукъ – коммунал шартланы яхшылашдырыв ва дагъы да кёп тармакълагъа пачалыкъны янында нечесе миллиард манат харжлар гёрсетилежек. Шоланы ичинде бизин районда 2 янгы школа ва дагъы да 2 бузукъ (аварийный) школа ­янгыдан къурулмагъа гёз алгъа тутулагъанын да ачыкълашдырды.

Сессияны ача туруп, район Жыйыныны ёлбашчысы Адил Салаватов оьзюню иш ёлдашларына район Жыйыныны депутатыны къуллугъуна Уллубийавулдан депутат гьисапда Азим Арсаналиев йиберилгенин эсгерген сонг, депутатлагъа ону ихтиярларын якъламакъ ва депутатны къуллугъуна белгилемекни таклиф этди. Шогъар гёре, депутатлар тавуш берген сонг, район администрацияны финанс ишлеге къарайгъан управлениесини ёлбашчысы Абубакар Шагьманаев трибунагъа гётерилди.

Трибунагъа чыкъгъан А.Шагь­манаев оьзюню сёйлевюнде Къарабудагъгент районну 2020-нчы йылгъа къабул этилген бюджетини умуми толуву гьакъда гьисап берди. Ону сёзлерине гёре, 2020-нчы йылгъа къабул этилген районну бюджетини гелимлери ва чыгъышлары толу кюйде яшавгъа чыгъарылгъан. Олай да, ол 2021-нчи йылгъа къабул этилген районну бюджетине ва 2022-2023-нчю йыллагъа планлашдырылгъан бюджетине алмашынывлар ва толумлашдырывлар этилмеге тарыкълыгъын айтгъан сонг, район Жыйыныны депутатларына шо таклифлени якъламагъа чакъырды.

Къарабудагъгент районну 2020-нчы йылгъа къабул этилген бюджетини толуву гьакъда баянлыкълар булан районну тергев-гьисап палатасыны ёлбашчысы Къаранай Абусайитов сёйледи. Ол эсгерген кюйде, умуми алгъанда 2020-нчы йылны бюджетини гьисабы федерал ва республика законлагъа къыйышывлу геле, халкъны социал талаплары яшавгъа чыгъарыла.

Сессияны барышында район администрацияны топуракъ ва мюлк аралыкълагъа жаваплы бёлюгюню ёлбашчысы Солтан Халилов топуракъ гесеклени сатыв-алыв этегенде багьасын токъташдырывуну кюю гьакъда баянлыкълар берди. Район администрацияны башчысыны орунбасары Жалалутдин Жамалутдинов район Жыйыныны депутатларына район администрацияны структурасына алмашынывлар этмекни таклиф этди.

Сессияны ахырында бирдагъы керен сёйлеген районну башчысы Магьмут Амиралиев район Жыйыныны депутатларын коронавирус аврувгъа къаршы вакцинаны этдирмеге ва шо гьакъда халкъны арасында генг кюйде англатыв юрютмеге тапшурду. Демек, районну гьакимбашыны сёзлерине гёре, бугюнлерде савлай районда 3 мингден артыкъ адам вакцина этдирген. Олай да, коронавирус ва пневмония аврувдан авруйгъанланы санаву гюн сайын арта. Шоланы гёз алгъа тутуп, районну халкъыны коллектив иммунитети болмагъа гереклигин М.Амиралиев аян этди. Шо саялы да, районну халкъыны 60 проценти сама коронавирусгъа къаршы вакцинаны этдирмеге тарыкъ.

Арагъа салынып ойлашылгъан масъалалагъа гёре, сессия оьзюню ишин тийишли къарарлар къабул этип тамамлады.