Ашлыкъланы тюшюмю къайтарыла
Яй ай – авлакъчылыкъ тармакъны къуллукъчулары учун инг къыставлу ва жаваплы вакъти. Авлакъчылар, механизаторлар, касбучулар, бу йылны тюшюмю мол болсун учун, оьзлени къолундан гелеген бары гьаракатны салып ишледилер. Авлакъ ишлени къурумлу, сан янлы кюйде оьтгермек учун ерлерде таман даражада тарыкълы техника етишмейгенине, бар техниканы иш ресурслары тезден битгенине де къарамайлы, районну механизаторлары оьзлерде бар техниканы аявлап, асырап къоллап, бары гьаракатны топуракъланы асувлу къолламакъгъа бакъдыралар.
Авлакъчыларыбызны, механизаторларыбызны гьаракаты булан, коронавирус инфекция аврувну четимликлерине де къарамайлы, гетген гюзде бу йылны тюшюмю учун районда 13 минг гектардан къолай майданлагъа къылчыкълы ашлыкълар чачма бажардылар. Шо – гёрмекли уьстюнлюк. Механизаторларыбызны къайратлы загьматы, касбу бажарывлулугъу болмагъан эди буса, эсги техника булан шунчакъы майданлагъа гюзлюк, язлыкъ къылчыкълы ашлыкълар чачма бажарылмас эди.
Районда топуракъланы асувлу къоллавун болдурувда юрт хозяйство производствода чалышагъан касбучулар, фермерлерибиз де аслам къошумун болдуралар.
Заманлар нече де тез гетип къала. Къарасанг, гьали-гьалилерде авлакъчылар тюшюмню гьайын эте туруп, ашлыкъ тарлавланы эрте язбашда этилме тарыкълы къуллукъларын кютюп тура эдилер. Гьали буса кёп харж ва къыйын тёгюп болдургъан тюшюмню тас этивсюз къолгъа алмакъны гьайын этме тарыкъ.
Районда 2021-нчи йылны тюшюмю учун чачылгъан ашлыкъланы орув масса кюйде башлангъан.
Ерлерде ашлыкъ къайтарыв кампаниягъа къуршалажакъ комбайнланы, оьзге тюрлю юрт хозяйство техниканы тарыкълы ремонтларын сан янлы кютюп, гьазирлик линейкагъа салгъан эдилер. Ашлыкъ къайтарыв кампания ерлерде къурумлу юрюле. Буссагьатгъы вакътиде районда ашлыкъ къайтарывгъа 15-17 комбайн къуршалгъан. Къорлукъда (резервде) тарыкъ болуп къалса, ишге гьазир дагъы да 4-5 комбайн бар. Ашлыгъы къайтарылгъан участкаланы саламын тайлагъа къысма 30-гъа ювукъ прес-подборщик бар.
Ашлыкъ къайтарывну биринчи жумасында районда 1240 гектар майданланы тюшюмю къайтарылгъан. Гьар гектардан орта гьисапда 22 центнер тюшюм алына. Чакъны авурлукъларын, чачывлар къургъакъ топуракълагъа ерлешдирилгенин гьисапгъа алса, яман гьасиллер тюгюл.
Ашлыкъ къайтарыв Гьели ва Губден юрт муниципал къурулувларда айрокъда къурумлу юрюле.
Гьелиде фермер Магьамматсайит Абсаламовну 500 гектарда ашлыкълары бар. Ашлыкъланы тюшюмюн къайтарывда мунда 4 комбайн ишлей. Башлапгъы гьасиллер къуванчлы, 20 гектардагъы арпаларыны гьар гектарындан 35 центнерден къолай тюшюм алгъан.
Губдендеги фермерлени натижалары да гьалиге яман гёрюнмей.
Районда ашлыкъ къайтарыв гьаракат гюн сайын чалтлаша.
Эсен къайтарыгъыз!
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
