Меню
16+

Сетевое издание «Будни района»

16.07.2021 09:15 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Яшлар бавларында…

Автор: Район администрацияны прес-къуллугъундан

Арт вакътилерде коронавирус инфекция аврувну яйылмакълыгъы ватандашланы юреклерине къоркъунчлукъ тувдура. Шо аврувну алдын алмакъ учун адамлар кёп жыйылагъан ерлерде маскалар гийип, олай да югъагъан инфекцияны аз этмек учун болгъан чакъы терезелени ачып, уьйлеге таза гьава гийирме, эртен-ахшам таза гьавадан айланма герек. Олай да, шо аврувгъа къаршы вакцина этсе, югъагъан инфекцияны токътатма имканлы.

Бугюнлерде бары да идараларда коронавирусгъа къаршы чаралар оьт­гериле. Шоллукъда, июль айны 9-нда «Бекенез» деген 3 номерли яшлар бавунда гиччипавланы ата-аналары булан коронавирус инфекцияны яйылыву къоркъунчлукъ тувдурагъаны гьакъда ёлугъув ­оьтгерилди. Оьтгерилген чарада билим берив управлениени ёлбашчысы Тажли Хизриева, ЦРБ-ни баш врачыны орунбасары Гюлженнет Расулова, УО-ну баш касбучусу Гюлзарият Бамматова, «Бекенез» деген 3 номерли яшлар бавуну ёлбашчысы Лимуният Ильясова ортакъчылыкъ этди.

Л.Ильясова чараны ортакъчыларына коронавирус инфекцияны заралыны ва бир адамдан бир адамгъа нечик юкъма болагъаны гьакъында хабарлады. Тезликде гьайын этмесе, арты къыйынлыкъгъа элтегенин билдирди. Шогъар гёре, яшланы ва ювукъ адамланы коронавирус инфекциядан къорумакъ учун ата-аналаны вакцина этмеге чакъырды.

Олай да, гелген къонакълар да жыйылгъанланы Роспотребнадзорну ва докторланы таклифлерин якъламагъа чакъырды. Къонакълар билдиреген кюйде, оьзюнгню ва адамларынгны къорумакъ учун биргине-бир къарар – савлай юртну ватандашларына вакцина этдирмек.

Олай да, «Юлдуз» деген яшлар бавунда да «Оьзюнгню ва ювукъ адамларынгны коронавирус инфекциядан сакъла!» деген баш булан ата-аналаны жыйыны болду. Яшлар бавуну ёлбашчысы Кавсарат Бийболатованы сиптечилиги булан оьтгерилген ёлугъувда маълумат сиясат Управлениени начальниги Адилбий Къурбанов, ЦРБ-ни медсестралары Муслимат Гьажиева ва Патимат Муташева, ЦРБ-ни врач-терапевти Нажабат Гьажиева ортакъчылыгъын болдурду.

К.Бийболатова ёлугъувгъа гелген ата-аналагъа разилик билдире туруп, жыйылгъанлагъа коронавирусну заралы гьакъда айтып, бугюнлерде уьлкеде тувулунгъан гьалны гёзден гечирди ва ёлугъувну ортакъчыларын вакцина этмеге чакъырды.

Жыйында сёйлеген А.Къурбанов да оьзю «къызыл зонагъа» барып гёргенлерин тындырыкълы кюйде хабарлады. Ону сёзлерине гёре, аврувлуланы барып гёрген адам башгъалагъа да тезликде вакцина этсин деп чакъырма герегин англатды.

Оьзюню сёйлевюнде врач терапевт Н.Гьажиева арт вакътилерде инфекциядан кёбюсю гезиклерде жагьиллер ва гиччи яшлар авруйгъанын хабарлады. Олай да, интернет торунда яйылгъан ялгъан ойлагъа ва хабарлагъа инанма ярамайгъанын аян этди.

«Къызыл зонада» ишлеген мед­сестралар М.Гьажиева ва П.Муташева ата-аналар ва медицина къуллукъчулар гьисапда сёйледи ва коронавирус инфекциядан сакъланма герекни гьакъында мисаллар гелтире туруп хабарладылар.

Ёлугъувну ахырында яшлар бавуну ёлбашчысы К.Бийболатова ортакъчылыгъын болдургъан ата-аналагъа баракалла билдирди, оьзлени ва яшларын савлугъун къорумагъа чакъырды.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

3