Гезикли жыйын

Юрюлген шо жыйында Советни уьюрлерини яртысындан да кёбюсю ортакъчылыгъын болдурдулар. Ветеранланы Советини председатели Имамутдин Жалилов шо гюнгю жыйынны ачды ва юрютдю. Инг башлап ол жыйынны ортакъчыларын арагъа салынгъан масъалалар булан таныш этди. Сонг ол биринчи масъалагъа гёре, бу йылны башындан бугюнлеге ерли ветеранланы Совети (къуруму) этген ишлер булан жыйылгъанланы ювукъдан таныш эте туруп сёйледи. Венгер агьвалатланы ортакъчылары булангъы ёлугъувлары гьакъда да баянлыкълар бере туруп хабарлады.

Йылны экинчи яртысында этилинме герекли, гёз алгъа тутулгъан ишлер булан да жыйылгъанлар таныш болдулар. Сонг ерлердеги ветеранланы башлапгъы къурумларыны ёлбашчылары: Уллубийавулдан Сапиюлла Ширавов, Къакъашурадан Садрутдин Зайнукъов, Манасдан Муса Мусаев, Къарабудагъгентден Нюрмагьаммат Мурзаев, Насрутдин Гьиравов ёлдашлар да чыгъып сёйледилер.

Жыйынны ахырында Советни уьюрлери Советни ярым йыллыкъ ишине орта багьа бердилер.