Авлакъчыларыбызны гьасиллери къувандыра

Айтма тарыкъ, ерлерде топуракъланы ишлетив хыйлы къолайлашгъан.

2021-нчи йылны тюшюмю учун районда 15263 гектар майдангъа къылчыкълы ашлыкълар чачылгъан. Шо участкаланы 9870 гектары – гюзлюклер. Шону ичинде 8602 гектары – будай, 1016 гектары арпа.

Язлыкъ ашлыкълар 5393 гектарда бар.

Бары да ерлерде йимик, бизин районда да ашлыкъланы тюшюмюн къайтарыв, тюшюмю алынгъан участкаланы саламын тайлагъа къысыв ишлер ерлерде жанлы юрюле.

Районну авлакъчылары, механизаторлар ашлыкъ къайтарыв кампаниягъа комбайнланы, оьзге тюрлю юрт хозяйство техниканы алданокъ ремонтларын кютюп, гьазирлик линейкагъа салгъан эдилер.

Буссагьатгъы вакътиде районну муниципал къурулувларыны топуракъларында ашлыкъланы тюшюмюн къайтарывгъа 26 комбайн къуршалгъан. Ашлыкъ ташывгъа къуршалгъан автотранспорт да етише. Тюшюмю алынгъан участкаланы саламын тайлагъа къысывда 14 прес-подборщик ишлей. Тарыкъ болуп къалса, гьазир прес-подборщиклер бар.

Буссагьатгъы вакътиде районда умуми алгъанда механизаторланы, оьзге касбучуланы гьар гюнлюк къайратлы загьматы булан 4050 гектар майдандагъы ашлыкъланы тюшюмю къайтарылгъан ва 9072 тон ашлыкъ алынгъан. Гьар гектаргъа гьисап этгенде орулгъан участкаланы гьар гектарындан умуми алгъанда 22,4 центнер тюшюм алынгъан. Шо – яман натижа тюгюл.

Бары агротехника чараланы тюз юрютген, оьзге къуллукъларын заманында оьтгерген, азыкъландыргъан фермерлерибизни гьасиллери дагъы да гёрмекли. Мисал учун, Гьелиде фермер Магьамматсайит Абсаматов 20 гектардагъы арпаларыны гьар гектарындан 35 центнерден къолай тюшюм алгъан. Губден зонадагъы фермерлени натижалары да къуванчлы.

2021-нчи йылны ашлыгъыны тюшюмюн къайтарыв гьаракат Гьели, Губден юрт муниципал къурулувларда къурумлу юрюле.

Гьелиде ашлыкъ къайтарыв кампанияда 8 комбайн къуршалгъан. Ашлыгъы алынгъан тарлавлагъа комбайнланы арты булан саламны тайлагъа къысагъан агрегатлар гире.

Ашлыкъланы тюшюмюн къайтарывну барышы Губден юрт муниципал къурулувда да яман гёрюнмей.

Къарабудагъгент юрт муниципал къурулувну топуракъларына чачылгъан ашлыкъланы тюшюмюн къайтарыв юрюле. Тек, мунда комбайнлар етишмей. Адамлар комбайнлагъа гезикге токътагъанлар бар.

Районда ашлыкъ къайтарыв къурумлу бара буса да, бары да ерлерде ашлыкъ къайтарывгъа къуршалгъан техника, от сёндюрегенде къолланагъан алатлар булан таъмин тюгюллери ёлугъа.

Комбайнлар ишлейген участкаланы ювугъунда сув машин, артына сабан тиркелген техника ёлукъмайгъан гезиклер ёлугъа.

Шу кемчиликлеге де къарамайлы, районда 2021-нчи йылны тюшюмюн къайтарыв къурумлу бара ва авлакъчыларыбызны гьасиллери яман гёрюнмей. Ашлыкъ къайтарыв созулгъан чакъы тас болувлар арта, ашлыкъ тарлавлар къаврай. Шо саялы ашлыкъ къайтарывгъа имканлыкълар бар буса, къошум комбайнлар къуршалса, зарал болмас эди.