Сергей Меликов бизин районда
Май айны 29-нда Дагъыстан республиканы Башчысыны заманлыкъгъа борчларын кютеген Сергей Меликов Къарабудагъгент районну Зеленоморск юртундагъы «Авангард» деген дав-патриот тарбиялав центр къурмагъа гёз алгъа тутулгъан ерге гелген.
Бираз алда оьтгерилген генгешлени бирисинде С.Меликов гелеген йылдан башлап эсгерилген центрны къурмагъа башланажагъы гьакъда айтгъан болгъан. Къурулажакъ дав-патриот центрны аслу мурады – оьсюп гелеген яш наслуну якълав промышленностну янгы технологиялары булан таныш этмек, оланы савлугъун яхшылашдырмакъ ва камиллешдирмек эди.
Центрны къурмакъ учун гёрсетилген топуракъ ДР-ни билим берив ва илму министерлигине болжалсыз замангъа оьзлеге къоллавгъа берилген. Гёрсетилген топуракъ Каспийск денгизни ягъасында, 2018-нчи йылдан берли иш гёреген «Каспий» деген яшланы савлугъун беклешдиреген лагерде ерлешген. Артдагъы йылларда шонда 4,5 гектаргъа ювукъ майдан пайдаландырылмагъан, демек, къаравсуз къалгъан.
Шо ерде центрны къурмакъ, яшёрюмлени савлугъун болдурмакъ, олар учун тюрлю чаралар оьтгермек, яшёрюмлеге заманны пайдалы йибермек учун бары да шартлар бар.
Гёрсетилген майдангъа толу кюйде тергев берген сонг, регионну башчысы Сергей Меликов яшёрюмлеге спортну «скалолазание», «страйкбол» къайдалары булан машгъул болмакъ учун ерлер къурма, воркаут-майданча этме гереклигин айтгъан. С.Меликов шо ишлени этивде жаваплы къуллукъчуланы модуль къайдада къурувгъа тергев бермеге чакъыргъан.
Республиканы башчысы айтагъан кюйде, янгыдан къурулагъан центрда гьар тюрлю тармакълагъа гёре ерлер болдурулмагъа тарыкъ.
«Яшёрюмлеге спорт булан машгъул болмакъ, демек, тюрлю ябушувлагъа уьйренмек учун тренажёр зал болдурулма герек. Олай да, волейбол, баскетбол оюнлар учун универсал зал этилме тарыкъ. Уьчюнчю залда дав гьазирлик гёрюв, машин гьайдама уьйретеген тренажёрлар салынма тарыкъ. Бир ерни (модуль) хас гьазирлик учун, демек, инженерлик гьазирлевге, халкъны масса кюйде ёкъ этивге къаршы ишлеге уьйретмек учун, оланы якълав учун да ер гьазирлеме тарыкъ», — деген С.Меликов.
Олай да, регионну башчысы тюрлю теория, билим берив дарслар оьтгермек учун ер, администрация бёлюк: ашюй, гьар тюрлю байрам чаралар оьтгермек учун ерлер, техника выставкалар оьтгермеге майданча болдурулмагъа герегин айтгъан.
«Къурулгъан центрда дав-патриот блокда эсделиклени, мемориалланы сакълавгъа аслу тергев берилмеге герек», — деген С.Меликов.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
