Бозигит Албёрюев: «Районда яшавлукъ-коммунал тармакъда кёп иш этилген ва узатылып тура»

– Бозигит Нажиюллаевич, районубузну ичинде бугюн-буссагьат не йимик программалар ва проектлер къабул этилген ва яшавгъа чыгъарыла?

– Гертилей де, артдагъы йылланы боюнда районубузда кёп санавда проектлер ва программалар башлангъан ва узатылып тура. Шолагъа гёре районубузну бары да юртларында, олай да, школаларда, яшлар, бавларында, социал биналарда янгыртыв ва ремонт ишлер юрюле.

Сонг да, юртланы орамлары ва ёллары да тийишли кюйде онгарыла. Айтагъаным, ёлавчулагъа ва машин гьайдавчулагъа онгайлыкълар болдурула. Демек, орамлар ва ёллар тегиш ва ярыкъ болса, хатабалагь­ланы санаву да хыйлы кемийгени ачыкъ. Аманлыкъ парахатлыкъны башы экенни де унутмагъа тюшмей.

– Умуми алгъанда районну администрациясы къайсы программалагъа ва проектлеге айрыча агьамият бере?

– Районну гьакимбашы Магьмут Амиралиев федерал ва республика даражаларда къабул этилген ва гюч­ге гирген бары да программаларда ва проектлерде ортакъчылыкъ этмекни масъаласын къатты кюйде салгъан. Гертилей де, бизин районубуз, умуми алгъанда, бары да шолай программаларда ва проектлерде гьаракатын гёрсетип ортакъчылыкъ эте деп айтмагъа тийишли.

Бир-эки шолай проектлени ва программаланы атларын эсгерейим.

«Демография», «Билим берив», «Онгайлыкълар болдурув», «Гьалиги девюрню школасы», «Маданият» деген ва кёп санавдагъы оьзге федерал программалар булан янаша «Мени Дагъыстаным» деген баш булан иш гёреген 3-4 республика оьлчевдеги проектлер. Олай да, республика инвестиция программа, район ва муниципал даражада къабул этилеген ва яшавгъа чыгъарылып турагъан дагъы да проектлер.

– Бозигит Нажиюллаевич, «Демография» ва «Билим берив» милли проектлер бир-бири булан тыгъыс байлавлу. Шоланы гьакъында ачыкълашдырып маълуматлар берсегиз?

– Сиз тюз эсгердигиз. «Демография» ва «Билим берив» милли проектлер бир-бири булан бек ты­гъыс байлавлу. Олар экиси де янаша яшавгъа чыгъарыла деп айтмагъа да ярай.

Гьали шо гьакъда генг кюйде айтайыкъ.

Бугюнлерде районубузну ичинде 3 яшлар бавуну къурулуву узатылып тура ва ювукъ арада шолар тамамланажакъ. Къарабудагъгент юртда 250 яшгъа бина къурулгъан. Шогъар 200 миллион манат харж этилген.

Дёргелиде 200 гиччипавгъа яшлар баву бите тура. Шогъар буса 170 миллион манатны къадарында харж гёрсетилген. Олай да, Жанга юртда, 40 миллион манат харж этилип, 120 яшгъа яшлар баву къурулду.

Шу яшлар бавлары янгы охув йылны алдында пайдаландырывгъа берилмеге герек.

Олар булан янаша дагъы да 8 яшлар бавун ва 4 школаны къурмакъ учун тарыкълы хас документлер онгарылып тура. Шолар барысы да гележекде районубузну ичиндеги юртларда къурулмагъа тарыкъ.

«100 школа» деген проектге кюрчюленип, райондагъы 8 школагъа ремонт этилди. Айтагъаным, уллу школалар булан бирче гиччи школалагъа да гёз къаратыла, тергев бериле.

«Точка роста» деген федерал проектге гёре, 7 школа хас документлерин берген. Демек, шо школаланы гьарисине 1 миллион 600 минг манатны къадарында тарыкъ-герек къураллар берилежек. Олай да, районну администрациясы да шоланы гьарисине 250 минг манат акъча гёрсете.

Школаларда охуйгъан 1-4-нчю класларыны охувчуларына исси аш бериле. Олар шо ашны школаланы ашханаларында ашай. Эсгерилген ашханаланы (пищеблоклар) тийишли алатлар булан да таъмин этмек муратда капитал ремонт этилген. Умуми алгъанда, 8 школагъа 13 миллион манат акъча харж этилген. Сонг да, 8 школагъа янгы пищеблоклар къурмакъ учун 109 миллион манатны къадарында хас документлер гьазир этилген.

– Сиз маданият ва спорт тармакъланы да уьстде эсгердигиз. Шоланы гьакъында да баянлыкъ­лар беригиз.

– Белгили кюйде, «Маданият» деген баш булан федерал даражада милли проект къабул этилген ва яшавгъа чыгъарылып тура. Шо проектге гёре де бизин районну юртларында да хыйлы иш этилген.

Шоланы гьакъында ачыкълашдырып хабарлайыкъ.

«ДР-де маданиятны оьсдюрювю» деген пачалыкъ программагъа гёре, 3 юртда маданият къалалагъа мекенли кюйде ремонт болдурулгъан. Айтагъаным, Къакъашура ва Дёргели юртланы маданият къалаларына капитал ремонт этилген. Шоланы гьарисине 10-11 миллион манат акъча коллангъан. Олай да, Къурбуки юрт маданият къаланы ремонтуна 2 миллион 500 минг манатдан артыкъ акъча харжлангъан.

Уьч де маданият ожакъланы ремонтуна районну бюджетинден 1 миллион 120 минг манат акъча йиберилген.

2021-нчи йылда, шо программагъа ва проектге гёре, Губден юртда янгы маданият къала къурулмагъа гёз алгъа тутула. Шогъар федерал бюджетден 26 миллион 700 минг, район бюджетден буса, 1 миллион 300 минг манат гёрсетилген.

Олай да, Дёргели маданият къаланы материал-техника базасын яхшылашдырмакъ учун 3 миллион 800 минг, Губден учун 4 миллион 700 минг, Къакъашурагъа 4 миллион 700 минг манат харж гёрсетиле. Озокъда, районну бюджетинден де шолагъа гьарисине 200-250 минг манат акъча салынгъан.

Уллубийавул, Гьели юртлардагъы маданият къалаланы капитал ремонт этмек учун 13-15 миллион манат тарыкъ. Паравулда буса маданият къаланы янгы бинасын къурмагъа гёз алгъа тутула.

Китапханалагъа да онг гёзюбюзден къарайгъан болгъанбыз. Масала, юрт ерде иш гёреген маданият къурумланы якъламакъ муратда ­РЦБОН-гъа ва Сирагиге 100-ер минг манат кёмек этилди. Олай да, маданият тармакъны бажарывлу къуллукъчусу деп, 3 адамгъа 50-шер минг манат акъча маялар гёрсетилди.

РФ-ни маданият министерлигине «Газель-Некст» библиобус алмакъ учун заявка берилген. Шо хас китапхана-машинни багьасы – 5 миллион 600 минг манат.

Деморграфия» деген милли проектни «Спорт – яшавну кюрчюсю» деген программасы бар. Шо программагъа гёре, Уллубийавул ва Агъачавул юртларда футбол учун янгы мини-майданчалар яйылды. Шоланы гьариси 2 миллион 300 минг манат. Олай да, Къарабудагъгент, Гьели ва Паравул юртларда воркаутлар салынды. Шоланы уьчюсюне де 600 минг манат харжланды.

2021-нчи йылда Къакъашура ва Дёргели юртлагъа воркаутлар салмагъа, Паравулда буса янгы футбол мини-майданча къурмагъа гёз алгъа тутулгъан.

– Бозигит Нажиюллаевич, бу лакъырыбызда аслу гьалда «Демография», «Билим берив» милли проектлеге гёре къабул этилген ва яшавгъа гийирилген программалар ва проектлер гьакъда мекенли жаваплар бердигиз. Гертилей де, районну бары да юртларында халкъны яшаву яхшылашдырылсын учун ва оланы социал талапларын кютмек учун хыйлы иш этилген ва энниден сонг да этилмеге плангъа гийирилген.

Шо ишни аслу гьалда сиз ёлбашчылыкъ этеген яшавлукъ-коммунал хозяйство управление юрюте. Сизге дагъы да оьрлюклер ва халкъ учун чалышывугъузгъа баракалла билдирмеге сюебиз.