Меню
16+

Сетевое издание «Будни района»

25.06.2021 09:06 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Вакцина этдиртмеге чакъырды

Автор: Нюрсагьадат Изамутдинова

Къарабудагъгент районну башчысы Магьмут Амиралиев районну Агъачавул, Гьели, Аданакъ, Паравул, Дёргели юртларына иш сапар булан баргъан. Демек, ол юртланы депутатлары, активи булан ёлукъгъан. Шо ёлугъувларда ону Къарабудагъгент ЦРБ-ни баш врачы Расул Гьиравов узатгъан. Ёлугъувларда юртланы башчылары ва депутатлары, идараларыны вакиллери ортакъчылыкъ этген. Районну башчысыны ёлугъувларыны аслу мурады – юрт ватандашланы дюньябызны елеген коронавирус аврувгъа къаршы вакцина этивге къуршамакъ эди. Ёлугъувну барышында Магьмут Амиралиев райондагъы бугюнгю эпидемиология гьалны гьакъында айтгъан.

Район больницада авруйгъанлар гюн сайын артагъанны, оланы арасында авур авруйгъанлары да барны эсгерген. Олай да, алдагъы гюнлерде авруйгъанланы бириси гечингенни эсгере туруп, тезликде вакцина этивге халкъ толу кюйде къуршалма гереги гьакъда айтгъан.

М.Амиралиевни ва Р.Гьиравовну сёйлевлеринден сонг, жыйылгъанлар коронавирусгъа къаршы этилеген вакцинаны адам учун болмагъа болагъан зараллары гьакъда соравлар берген.

Адамланы соравларына жавап бере туруп, районну башчысы районну халкъыны арасында инг биринчилей болуп оьзю вакцина этдиргенни, олай да агьлюсюндегилеге де этдиртгенни ташдыргъан. Вакцина этдирген адамланы бирлерини иссилиги гётерилме, сувукъ сындырма болагъаны гьакъда англатгъан.

Жыйылгъанлар олагъа: «Ковидден авругъан адамгъа вакцинаны этдирме тарыкъмы? Вакцина этивге не къаршылыкълар бар? Вакцина этдирген адам не затдан сакъланма тарыкъ?»-деген ва башгъа тюрлю соравлар берген. Оьзлеге берилген соравланы барысына да М.Амиралиев ва Р.Гьиравов мекенли ва ачыкъ жаваплар къайтаргъан.

«Социал сетлерде вакцина этдиргенлени арасында оьлгенлер бар деген хабарлар – ялгъан. Бизин районда вакцина этдирген бир адам да оьлмеген!»-деп жаваплангъан районну башчысы.

-Районда авруйгъанланы, демек, инфекция бёлюкде коронавирус инфекциядан авруп ятгъанланы арасында «индийский штамм» журасы булан эки адам бар. Оланы авруву оьзгеленикинден эсе авур юрюй. Олай да, коронавирусну «индийский штамм» журасындан жагьиллер де аврума бола”,-деген Р.Гьиравов.

Ёлугъувну барышында районну башчысы гьар юртда нече адам вакцина этдиргенин мекенли санавлар булан ташдыргъан. Гьасиллеге гёре, районну бир-бир юртларында вакцина этгенлени санаву 5 процентге де етишмейгенни районну башчысы жыйылгъанлагъа англатгъан ва тезликде вакцина этивге актив кюйде къуршалмагъа бары халкъны чакъыргъан.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

2