Оьр къуллукъгъа белгиленген

Анварбек Сейтиев 1973-нчю йыл 24-нчю мартда Къарабудагъгент юртда тувгъан. Ол башлап Къарабудагъгент сегиз йыллыкъ школада (гьалиги 3 номерли орта), сонг Къарабудагъгент бир номерли орта школада (Гимназия) охугъан. А.Сейтиев 1990-нчы йыл школаны алтын медальгъа битдирген. Сентябр айда Дагъыстан Пачалыкъ университетни юридический факультетине тюшген.

Оьр билим алгъан сонг, 1995-нчи йылдан 1997-нчи йылгъа ерли ол районну «Герей-тюз» предприятиесинде юристконсульт болуп ишлеген. Анварбек Сейтиев 1997-нчи йыл Магьачкъаланы прокуроруну кёмекчиси болуп ишлеген. 2002-нчи йылны июль айыны 7-нде Къызылюрт шагьарда прокурорну кёмекчиси этилип белгиленген болгъан. Алты ай гетип, Анварбек Сейтиев къайтып Магьачкъала шагьаргъа Советский районну прокуроруну кёмекчиси болуп геле. 2003-нчю йылдан 2007-нчи йылгъа ерли Магьачкъала шагьарны Советский районуну прокуроруну баш кёмекчиси бола. 2007-нчи йыл сентябр айны 12-нде ол Магьачкъала шагьарны Советский районуну прокуроруну орунбасарыны къуллугъун кюте.

2016-нчы йылны декабр айында А.Сейтиев ДР-ни прокуратурасыны ватандашланы эркинлигин ва ихтиярларын сакълавда тергев юрютеген бёлюкню начальниги болуп белгиленген.

Анварбек Сейтиевни законну якълав къурумларда ишлейгени 24 йыл бола.

Ол ДР-ни Халкъ Жыйыныны Гьюрметлев грамотасы, «ДР-ни ат къазангъан юристи», «Россия Федерацияны Генеральный прокурору» ва оьзге баракалла кагъызлар, гьюрметлев грамоталар булан савгъатлангъан.