Эсден таймайгъан агьвалат

Шоллукъда, 80 йыл алъякъда дюньяны уьстюнде лап да къайгъылы ва къагьрулу Уллу Ватан дав башлана. 80 йылны боюнда дав майданларда, игит ябушувларда, чапгъынларда ва къамавларда белгисиз тас болгъан элибизни якълавчуларыны атлары табыла ва дос-къардашларына етишдириле.

Уллу Ватан дав башлангъанлы 80 йыл болагъанына багъышланып, Къарабудагъгент юртну Уллубий Буйнакскийни атындагъы ял алагъан пачалыкъ бавунда эсделик чара ­ ­оьтгерилди.

Шо чараны барышында Къарабудагъгент район администрацияны башчысы Магьмут Амиралиев, «Къарабудагъгент район» муниципал районну депутатларыны Жыйыныны ёлбашчысы Адил Салаватов, Къарабудагъгент юртну башчысы Магьамматсолтан Гьасанов, Къарабудагъгент районну тамазаларыны советини ёлбашчысы Абдулгьамит Мамагишиев, КЦСОН-ну къуллукъчулары ва оьзге ёлдашлар оьзлени ортакъчылыгъын болдурдулар.

Чараны аввалында районну ёлбашчылары Уллу Ватан давда белгисиз тас болгъанланы эсделигине салынгъан памятникни алдына жанлы гюллер салды.

Эсделик чараны юрютювчю, маданият бёлюкню ёлбашчысы Найида Мурзаева 80 йыл алъякъда башлангъан ва 4 йылны боюнда юрюлген Уллу Ватан давну акъубасы, къайгъысы гьакъда эсгерген сонг, 1 минут шыплыкъ билдирди.

Чараны барышында РЦБОН давгъа багъышлангъан китап выставкасын гёрсетди. Китапхананы гьаракатчы охувчулары давгъа багъышлангъан шиъруларын гё­нгюнден охудулар. А.Къаплановну атындагъы эргишилени хоруну ёлбашчысы Аскендер Исрапилов «Аталар» деген йырны йырлады.

Эсделик чараны барышында районну гьакимбашы Магьмут Амиралиев ватаныбызны тарихин, ватандашларыбызны къоччакълыкъларын ва уьлгюлю яшавун оьсюп гелеген яш наслугъа таза ва герти кюйде сакълама тапшурду.

Олай да, ол оьзюню сёйлевюнде районну ичиндеги бары да къурумланы ва идараланы къуллукъчуларына ва халкъына оьзюню савлугъун сакъламакъны ёрай туруп, уьстюбюзге гелген коронавирус аврувгъа къаршы вакцинаны этдирмеге чакъырды.