“Россия – мени эркин элим!”

Россияны гюнюне багъышлангъан шатлыкъда Къарабудагъгент юртдагъы Баш китапхананы къуллукъчулары ва актив охувчулары, маданият центрны, юртдагъы эл-ахтарыв музейни, КЦСОН-ну къуллукъчулары, яшлар бавларыны гиччипавлары ва тарбиялавчулары, чакъырылгъан къонакълар, юртлулар ортакъ­чылыкъ этди.

Чараны ачгъан ва юрютген актив китапханачылар Азинат Пашаева ва Динаханым Ильясова бары да жыйылгъанланы Россияны гюню булан къутлады, олагъа кёп яхшылыкълар, парахат яшав ва оьрлюклер ёрады. Сонг, олар гезиклетип Россияны гюню байрамны тарихи гьакъда хабарлады. Кёп йыллар алъякъда бизин уллу наслуларыбыз бугюнгю яшав ва парахатлыкъ болсун учун кёп къыйынлыкълар гёргени, нечесе жагьил уланлар жанын къурбан этгени гьакъда айтды. Бизин бугюнгю яшавубуз саялы биз оланы алдында гьар даим баш иймеге, оланы эсделиклерине уллу гьюрмет этме герегибиз гьакъда бирдагъы керен яш наслуну эсине салды.

Сёз берилген къонакълар, демек, «Золушка» деген яшлар бавуну гиччипавлары байрамны ортакъчыларына оьзлени янгы къурулгъан бийивюн савгъат этди. Къаравчулар оланы бийивюн кёп сююп къаршылады.

Райондагъы халкъланы китап­хана къуллукъларын кютеген Центрны ёлбашчысы Аминат Сотаева бары да жыйылгъанланы байрам булан къутлады. Яшёрюмлени ватанны тарихин билме, эсделиклеге абур этме, элин сюйме ва яхшы охума чакъырды. Россияда яшайгъан бары да миллетлер гьар заманда да дослукъда, татыв­лукъда яшагъаны гьакъда хабарлады.

А.Къаплановну атындагъы хорну ортакъчылары байрамгъа гелгенлеге «Мени Россиям» деген йырны багъышлады. Олай да, Къарабудагъгент маданият Центрны йыравлары Гилянханым Агьматова ва Абдулазим Найип­ханов жыйылгъанланы байрам булан къутлагъан сонг, олагъа оьз­лени йырларын багъышлады. Байрам чараны узата туруп, яшлар учун «Ватан неден башлана?» деген викторина , «Мен Россияны суратлайман» деген асфальтда сурат этив конкурс оьтгерилди.

Чарада ортакъчылыкъ этген яшлар оьзлер учун оьтгерилген викторинада ва конкурсда актив кюйде ортакъчылыгъын болдурду. Байрам чара уллулар учун да, яшлар учун да эсде къалардай шатлыкъда оьтдю.