Налогланы толувуна къаралды

Генгешни ача туруп, районну башчысы Магьмут Амиралиев июнь айны 13-нде районну ичиндеги бир нече юртларда болгъан табии хатабалагьны – телиянгур явувну гьакъында эсгерди. Демек, ону сёзлерине гёре, уллу янгур явувну ва ондан сонг болгъан ташгъынны натижасында адамланы яшавлукъ уьйлерине кёп зарал болгъан. Шо болгъан заралны гьисабын чыгъармакъ ва халкъгъа кёмек болдурмакъ учун район администрацияны ГОиЧС бёлюгюне ол оперштабны чакъырмагъа ва хас комиссия къурмагъа тапшурув берди.

Сонг районну гьакимбашы М.Амиралиев район администрацияны башчысыны орунбасары Сапиюлла Сайитовгъа 2021-нчи йылны бюджетини 5 айыны толуву гьакъда маълуматлар бермеге трибунагъа чакъырды.

Трибунагъа гётерилген С.Сайитов оьзюню сёйлевюнде ватандашлардан жыйылагъан топуракъ, мюлк ва транспорт налогланы жыйылыву гьакъда маълуматлар берди.

Район администрацияны башчысыны орунбасары берген баянлыкълагъа гёре, районну умуми бюджетини толуву – 85 процент. Ерли налогланы 100 процентден артыкъ этип толтурагъан юрт администрациялар: Къарабудагъгент, Манас ва Агъачавул.

«Бугюн-буссагьат районну ичинде транспорт налог борч­ну къадары 310 миллион манатгъа етише. 2021-нчи йылны 5 айыны узагъында 21 миллион манатны оьлчевюнде транспорт налог жыйылгъан.

Эсгерилген налогну жыйылывун артдырмакъ ва оьсдюрмек учун ГИБДД-ни, налог ва суд пристав къуллукъланы ишчилеринден хас комиссия къурмагъа ва шо ишни гючлендирмеге таклиф этемен»,-деди С.Сайитов оьзюню сёйлевюн тамамлай туруп.

Иш ёлдашыны таклифин якълай туруп, районну гьакимбашы Магьмут Амиралиев суд пристав ва ярашывлукъ судлагъа кёмек болдурмагъа тапшурду.

«Бирдагъы керен эсигизге салмагъа сюемен: машин гьайдавчулардан жыйылагъан транспорт налог толу кюйде шо юртгъа йибериле. Демек, шо йиберилген акъчаны къадарында юртну орамларына ва ёлларына асфальт салынмагъа, мекенли кюйде ремонт этмеге имканлыкъ бериле»,-деп эсгерди оьзюню сёйлевюнде М.Амиралиев.

Генгешни тамамлай туруп, районну гьакимбашы М.Амиралиев сугъарылагъан сувну етишмейгенлиги, КОР-ну ремонт этмеге тарыкълыгъы ва сув сакъланагъан хас объектлени кагъызларын онгармагъа гереклиги гьакъда бирдагъы керен ­айтды.