Меню
16+

Сетевое издание "Району яшаву"  «Будни района»

18.06.2021 09:33 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Чёп таaшыйгъан машинлер

Автор: Багьавутдин Самадов

Артдагъы йылланы боюнда районну ичиндеги юртланы санитар гьалын яхшылашдырмакъ учун бир къадар иш этилген. Демек, орамланы, ёл ва оьзен бойланы тазалыгъын болдурмакъ учун иш юрюлюп тура. Ачыкълашдырып айтсакъ, чёпню ва нас-алагъожаны топлама, жыймакъ ва ташламакъ учун хас контейнерлер (къутукълар) салынгъан. Чёпню жыягъан ва къуюлагъа етишдиреген техника иш гёрмеге башлагъан.

2019-нчу йылда районубузда «ДагЭкоДом» деген къурум ишлемеге ва нас-алагъожаны жыймагъа ва ташламагъа гиришди. Шо эсгерилген идараны Къарабудагъгент райондагъы бёлюгюню ёлбашчысыны къуллугъуна жагьил улан, оьз ишини касбучусу Камил Муратов белгиленген.

«ДагЭкоДом» къурумну Къарабудагъгент райондагъы бёлюгю бугюнлерде районну ичиндеги бир нече юртну чёбюн ва нас-алагъожасын жыя, топлай ва тийишли ерлеге етишдире. Шо ишни кютмек учун шоланы хас техникасы да бар.

2021-нчи йылны баш гюнлеринде республикабызны тахшагьары Магьачкъалада чёп ва нас-алагъожа булангъы къувунлу гьалны савлай элибиз гёрдю. Айтагъаным, шагьарны ичиндеги чёпню ва нас-алагъожаны жыймагъа ва тайдырмагъа тарыкълы хас идара оьзюню тувра борчларын кютмейгени ­ачыкъ болду.

Районну башчысы Магьмут Амиралиев санитар гьалгъа бек агьамият берегени белгили. Айтагъаным, район администрацияны аппаратыны гегешлеринде ол районну ичиндеги юртланы, ёлланы ва орамланы тазалыгъы ва санитар гьалы гьакъда гьар гезик айта ва шо ишни ёрукълашдырмагъа тарыкъны таклиф этди.

15-нчи июнда районну башчысы Магьмут Амиралиев «ДагЭкоДом» къурумну Къарабудагъгент райондагъы бёлюгюню иши булан ювукъдан таныш болду. Демек, шо гюн идарагъа 5 хас техника гелтирилди.

«ДагЭкоДом» къурумну Къарабудагъгент райондагъы бёлюгюню ёлбашчысы Камил Муратовну сёзлерине гёре, районну ичинде санитар гьалны сакъламакъ ва яхшылашдырмакъ учун 18 хас техника ишлей. Шоланы 14-ю – чёп ташыйгъан машинлер. 8 КамАЗ ва 4 МАЗ машинлер чёпню жыймакъ учун иш гёре. Олай да, орамланы ва ёлланы сибиреген ва жувагъан 1 хас машин бар.

Районну гьакимбашы Магьмут Амиралиев Камил Муратовгъа гелген янгы машинлени ва оьзге хас техниканы къоллап, чёпню ва нас-алагъожаны тайдырмакъ ва тазалыкъны болдурмакъ учун белбюгюп, этекчалып чалышмагъа тапшурду. Олай да, ол Къарабудагъгентни уллу ва баш орамларыны тазалыгъын болдурмакъны талап этди.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

3