Уьлгюлю рагьмулулукъ

Комплекс Магьачкъала ва Каспийск шагьарланы арасында, 35 гектар ерде, савлай дюньяны халкъыны къолкъошуву булан къурула. Центрда межитден къайры да школа, яшлар баву, къонакъюй, реабилитация центр, спорткомплекс, тегин ашюй, ислам динге охув ожакълар, рагьмулукъ фонд, парк, фонтанлар, велосипед ва роликлер гьайдалагъан ёллар, чабагъан майданчалар, кёп ва тюрлю тереклер чачылгъан ял алагъан бавлар болажакъ.

Къурулагъан Магьаммат пайхаммарны аты къоюлгъан межитни оьлчевлери – 200-150 метр. Туристлер учун айрыча ёллар, сакъат адамлагъа лифтлер, намаз жувунмакъ учун ерни тюбюнде уьйлер ишленежек. Межитни 47 метр бийиклиги булан 6 минмарасы болажакъ. Шоларда къарайгъан майданчалар къурулажакъ. Олай да, межитни янында Дагъыстанда Ислам динни тарихини музейи ишленежек.

Ишленеген межитни бу йылны февраль айыны башында къалкъысын бегитив ишлени бизин районлу, аты яхшыгъа айтылгъан, рагьмулу къоллу депутатыбыз Магьамматсолтан Байболатович ­оьзюню бойнуна алгъан. Барыбыз да билеген кюйде, ол – инг де рагьмулу, чомарт къоллу, кёп садагъасы булангъы районлубуз. Нечесе йылланы узагъында М.Магьамматов районлуларына эт, тавукъ, ун, шекер садагъалары, етишип болмайгъанлагъа Гьаж къылма барма кёмек этегенлиги, районда ишленеген тюрлю къурулушлагъа спонсорлукъ кёмеги булан танывлу.

«Оьзюгер Аллагь рази болсун! Этеген садагъалары минг керен артып оьзюгер къайтсын! Аллагь огъар савлукъ ва узакъ оьмюр, агьлюсюне парахатлыкъ берсин!» — деп, районлулар Аллагьдан тилей. Магьамматсолтанны атасы Байболатгьажи де инг яхшы, рагьмулу, динге берилген адамланы бириси болгъан. Демек, шолай яхшы адамны уланы да яхшы адам болажагъы гьакъ зат.

Муна гьали де Магьамматсолтан Байболатович Европадагъы инг де уллу межитлени бириси – Магьаммат пайхаммарны (с.а.с) аты къоюлгъан межитни къалкъысын да ябып, минмараларын салыв ишлени харжын толу кюйде оьзюню бойнуна алып, иш юрюте.

Бирдагъы керен Магьамматов Магьамматсолтан Байболатовичге савлукъ, узакъ оьмюр, халкъы учун дагъы да кёп яхшылыкълар этмеге гюч ёрайбыз! Огъар ошайгъан рагьмулу къоллу ва таза юрекли адамлар арабызда кёп болсун!