Социал къуллукъчуланы гюню

Шо гюн байрам гюн деп 2000-нчи йылны октябр айыны 27-нде РФ-ни Президентини 1796-нчы номерли къарары булан белгиленген. Шо гюнню байрам гьисапда айырмакълыкъны себеби де 1701-нчи йыл июнь айны 8-нде Пётр I «Об определении в домовых Святейшего Патриарха богадельни нищих, больных и постарелых» деген баш булан етишип болмайгъан, чарасыз, зайып, къарт адамланы якъламакъ учун къарар къабул этген болгъан. Пётр I къабул этген къараргъа гёре, шо кёмек уьйде (богадельня) 10 чарасыз адамгъа 1 савлугъу булангъы адам къарама, олагъа тарыкъ кёмекни этме герек болгъан. Гьалиги социал къуллукъланы ишиде шо замангъы кёмек этеген уьйлерден баш алгъан.

Россияда императорланы гьаракаты булан шо заманларда кёп етим яшланы тарбиялайгъан ерлер, «богадельня» уьйлер, тарбия береген ерлер къурула болгъан. Совет гьукумат къурулгъан сонг, 1917-нчи йыл халкъланы социал къуллукъларын кютмек учун Халкъ комиссариаты къурулгъан, 1946-нчы йыл РСФСР-де халкъланы социал къуллукъларын кютеген Министерлиги къурулгъан.

1991-нчи йыл халкъланы социал къуллукъларына тергев ва кютюв ишлени РФ-ни социал якъдан якълав министерлиги кютме башлагъан, 1996-нчы йыл шо министерлик Загьмат ва социал оьсюв Министерликге гирген.

2004-нчю йыл март айны 9-нда Президентни къарары булан РФ-де савлукъ сакълав ва социал оьсюв министерлиги къурулгъан. 2012-нчи йылны май айында эки бёлюнюп, савлукъ сакълав министерлик, олай да загьмат ва социал оьсюв министерлик къурулгъан.

Социал сиясатны ишинде аслу тармакъ гьисапда гьар заман ­халкъланы социал къуллукъларын кютюв болгъан.

Социал къуллукъчуланы иши – къыйын гьалдагъы адамланы къуллукъларын кютюв, оланы якълав ва кёмек этив болуп токътай, демек, бек рагьмулу иш.

Бугюнлерде социал къуллукъчуланы иши инг де тарыкълылардан санала. Россияда шо тармакъда 630 минг адам ишлей, олар 26 миллион адамны къуллукъларын кюте, шоланы 15 миллиону – къарт болгъан ва сакъат адамлар.

Социал къуллукъланы кютеген касбучуланы гьазирлемек учун Россияда 120 оьр билим береген ожакъ иш гёре.