«Бизин гючюбюз – бирликде…»

Форумну Дагъыстанны милли сиясатыны ва ругьани ишлеге къарайгъан министерлиги «Дагъыстанлы къатынланы Союзу» деген жамият къурум булан бирче онгаргъан ва оьтгерген. Форумда республиканы бары да ерлеринден гелген къатынгишилени делегациялары ортакъчылыкъ этген.

Олар Дагъыстанны социал-экономика оьсювюнде къатынланы потенциалын къоллавну, олай да къатынгишилени гьаракатыны, ишини оьсювю ва генглешивю гьакъда сёйлеген. Форумда бизин райондан баргъан къатынгишилени делегациясы да ортакъчылыгъын болдургъан. Демек, башында районну къатынгишилерини Союзуну председатели, ДР-ни къатынларыны Союзуну Президиумуну уьюрю Гюлжанат Темирова да булан бирче 8 къатынгиши болгъан. Чара «Дагестан» деген ГТРК телеканалны журналистлери къургъан фильмны гёрсетив булан башлангъан. Фильм ДР-ни къатынларыны яшавуна ва чалышывуна багъышланып юрюлген. Фильмде Дагъыстанны оьсювюнде къатынгишилени ролю гьакъда ай­тылгъан. Дагъыстанны къатынгишилерини Союзуну председатели Интизар Мамутаева оьзюню сёйлевюнде республикабызны оьсювюнде дагъыстанлы къатынланы къошуму гёрмекли экенин айрыча эсгерген, оланы атына лайыкълы сёзлер айтгъан.

И.Мамутаева дербентли къатын Светлана Хановагъа къатынгишилени бирлешивюню янындан Баракалла кагъыз ва акъча савгъат тапшургъан. Ону къызы Ирада форумну ортакъчыларына оьзюню «Мой Дагестан» деген музыкалы композициясын савгъат этген. Ирада – сакъатлыгъына да къарамайлы, яратывчулукъ чалышыв булан машгъул, бек гьаракатчы ва пагьмулу къызъяш. С.Ханованы агьлюсюнде ондан къайры да 3 яш оьсе ва тарбиялана.

ДР-ни милли сиясатына ва дин ишлеге къарайгъан министрини ­борчларын заманлыкъгъа кютеген Энрик Муслимов ДР-ни къатынгишилерине адатларыбызны сакълайгъаны ва узатагъаны саялы, уьлкебизни халкъларыны эдеп-къылыкъ тарбиясын оьсдюрювге этеген къошуму саялы баракалла билдирип сёйлеген.

Форумну ишин узата туруп, Ленинни атындагъы майданчада къатынгишилени тюрлю тюслю явлукъларыны фестивалы оьтгерилген.