Уллубийавул орта школада

Мактапны майданчасы гьар тюрлю ренкли шарлар, суратлар булан безенген. Выпускниклер, муаллимлер, ата-аналар ва чакъырылып гелген къонакълар тизилген сонг, байрамны юрютювчю – мактапны муаллимми Машарат Алимирзаева оьзюню гиришив сёзюнде бары да жыйылгъанланы Ахырынчы зенг булан къутлады ва ЕГЭ-лени, ОГЭ-лени беривде охувчулагъа уьстюнлюклер ёрады.

Уллубийавул орта мактапны директору Муъминат Умаева оьзюню сёзюнде 11-нчи ва 9-нчу класланы тамамлайгъан выпускниклеге пачалыкъ экзаменлени беривде оьрлюклер ёрагъан сонг, муаллимлеге ишин оьр даражада юрютгени учун разилигин билдирди.

Олай да, Ахырынчы зенг байрамны барышында Уллубийавул орта мактапны директоруну орунбасарлары Муъминат Мамаева, Рабият Магьамматова, муаллимлери Гьюсейхан Мамаев, Гюлнара Хидивова, Арисханым Лабазанова ва Нюрлюгьаят Умаева сёйледилер. Олар ­оьзлени сёйлевлеринден охувчулагъа ва муаллимлеге яхшылыкълар ёрадылар.

Байрамны барышында район администрацияны атындан районну администрациясыны прес къуллугъуну ёлбашчысы Багьавутдин Самадов сёйледи. Ол оьзюню сёйлевюнде мактапны тамамлайгъан выпускниклени, муаллимлени ва бары да охувчуланы охув йыл тамамлангъаны булан районну башчысы Магьмут Амиралиевни атындан къутлады ва олагъа билим алывда ва яшавунда уьстюнлюклер ва оьрлюклер ёрады.

2021-нчи йылда Уллубийавул орта мактапны тамамлайгъан 15 выпускникге ва 9-нчу класны битдиреген 62 охувчугъа Ахырынчы зенгни 1-нчи «а» класны охувчусу Гюльяна Умаева ва 11-нчи класны охувчусу Алимагьаммат Имакъов къакъдылар.

Ахырынчы зенгни байрамы эсделикге суратлар чыгъарыв ва савгъатлар берив булан узатылды.