Къарабудагъгент 5 номерли орта школада

Шо гюнгю байрамда выпускниклер, охувчулар, муаллимлер, ата-аналар ортакъчылыкъ этди.

Ахырынчы зенгге багъышлангъан шатлыкъны ача туруп, ону юрютювчюсю школаны вожатыйы Ж. Хакимова бары да жыйылгъанланы байрам булан къутлады.

Сонг шатлы линейкагъа байрамны есилери 4-нчю, 9-нчу ва 11-нчи класланы выпускниклери ва оланы клас ёлбашчылары чакъырылды.

Байрам чарада сёйлеген школаны директору Магьамматмурат Канзитдинов выпускниклени, оланы муаллимлерин ва ата-аналарын бу шатлыкъ булан къутлай туруп, олагъа кёп яхшылыкълар, элине ва халкъына пайдалы адамлар болуп оьсмекни ёрады.

Шо гюн оьтгерилген Ахырынчы зенг байрамда Къарабудагъгент юртну ёлбашчысы Магьамматсолтан Гьасанов ва район газетни ёлбашчысы Асадулла Гьажиев ортакъчылыкъ этдилер.

Сонг выпускниклер школасына, директоруна, кёп сюеген муаллимлерине оьзлени шиъруларын багъышлады ва бийивлерин гёрсетди.

Арты булан башлапгъы класланы охувчу яшлары выпусниклеге оьзлени музыкалы чыгъышларын савгъат этди.

Оьтгерилген шатлыкъда башлапгъы класланы охувчулары да выпускниклени атына оьзлени шиъруларын багъышлады. 11-нчи класланы выпускниклери оьзлени кёп сюеген муаллимлерине гиччирек шиърулар охуду.

Байрамны ахырында Ахырынчы зенгни къакъмакъ учун 11-нчи класны охувчулары Нюрбике Арсланбекова, Румия Аминтазаева, Умалат Агьматов ва 1-нчи класланы охувчулары Асил Гьажиева, Айгум Арсланбеков ва Умар Идрисов чакъырылды. Чараны ахырында охувчу яшлар кёкге шарланы учурду.