Къакъашурада шатлы агьвалат
Май айны 27-нде, хамисгюн, бизин районубузну Къакъашура юртунда шатлы агьвалат болду. Демек, шо гюн Къакъашурада янгыртылгъан маданият къаланы ва янгы къурулгъан футбол майданчаны ачылывуна багъышлангъан шатлы чаралар оьтгерилди.
Къакъашурада болгъан шо шатлы агьвалатда Къарабудагъгент районну гьакимбашы Магьмут Амиралиев, районну администрациясыны башчысыны орунбасарлары, управлениелерини ва бёлюклерини ёлбашчылары, ерли маълумат къуралланы вакиллери оьзлени ортакъчылыгъын болдурдулар.
Инг башлап, олар Къакъашурадагъы янгыртылгъан маданият къаласыны ачылывуна байлавлу чараны оьтгерди. «Маданият» деген милли проектге гёре, юртну маданият къаласына мекенли кюйде ремонт этилген, шону къалкъысы, тамлары, поллары, эшиклери-терезелери ва иссилик береген системасы мекенли кюйде онгарылгъан.
«Бугюн Къакъашураны халкъы учун уллу шатлы ва сююнчлю гюн деп айтмагъа сюемен. Неге тюгюл де, къакъашуралылар учун янгыртылгъан маданият къала ва оьсюп гелеген наслу учун янгы футбол майданча ачыла.
Маданият уьйню мекенли кюйде онгармакъ учун пачалыкъны янындан 12 миллион манатны къадарында харж гёрсетилген. Шону 500 минг манатдан къолайы районну бюджетинден берилген. Янгыртылгъан маданият къаланы ичинде 450 адам олтурмагъа ва театрлагъа, кинолагъа къарамагъа болажакъ. Олай да, яш спортчулар учун ачылагъан спорт майданча пачалыкъны ва ерли далапчыланы бирликдеги кёмеги булан къурулгъан. Майданчаны оьлчевлери – 24 ва 47 метр. Футбол майданчаны къурмакъ учун умуми алгъанда 2 миллион 800 минг манатдан артыкъ харж гёрсетилген.
Къакъашураны жамиятын шу сююнч агьвалат булан къутлайман, къатты савлукъ ва насип ёрай туруп, гележекде дагъы да уьстюнлюклеге етишер деп инанмагъа сюемен», — деп эсгерди районну башчысы Магьмут Амиралиев оьзюню сёйлевюнде.
Сонг футбол майданчаны ачылыву да болду. Онда яшёрюмлер оьзлер лап кёп сюеген футбол оюнну ойнадылар.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.