Эмли къоллу Махружат
Бугюн арабызда ёкъ белгили хирург Исрапил Исаевни бир шиърусундагъы: «Инг уллу байлыкъ адамгъа – савлукъ». деген сёзлени маънасын ойлашып къарасакъ, гертилей де, савлукъгъа етеген бир зат да ёкъ. Гёрюп турабыз, бугюнлерде инсанлар давление, шекер, инсульт, нерва аврувлагъа тарып, не этегенин билмей инжине, кант эте, зарлана. Ажжалгъа талав йимик, яйылгъан коронавирус аврув да халкъны гьалеклендирди, къоркъув берди.
Оьзге юртларда йимик, Къакъашурада да больница ачылып иш гёрегени хыйлы йыллар бола. Шо заманны ичинде Буйнакск районну Чанкурбе, Къадар юртлардан авругъанлар гелип савлугъун беклешдирип турдулар. Заманлар алышынып ёлугъагъан четимликлени енге туруп, больницаны коллективи оьзлеге берилген ишге хыянат болмай чалышагъаны сукъландырмай болмай, бугюнлерде больницабызда 30-гъа ювукъ адам чалыша.
Биз оьзюню гьакъында сейлежек медицинаны къуллукъчусу Махружат Вагьапова – юртда тувгъан, оьсген, тарбия алгъан тиштайпа. Школаны охуп битдирген сонг, 1985-нчи йылда ол Буйнакск шагьардагъы медицина училищеге охума тюшген. Охув ожакъны гёрмекли натижалар булан тамамлагъан М.Вагьапова 1988-нчи йылда ата юртуна ишге бакъдырыла. Арадан аз заман да гетгинче, оьзюню гьаракатын, сайлагъан касбусуна муштарлы, гьаракатчы Махружат коллективни арасында абур, сый къазана
Махружат Гиппократ антына амин болуп чалышагъанлы арадан 33 йыллар тамамлана тура. Шо йылларыны ичинде бу ёлдаш аврувлагъа болагъан кёмегин болдуруп юрюй. «Доктор иржайса, аврувгъа енгиллик» деп нагьакъ айтылмай. Мен оьзюм аврувлагъа чырмалып кёп инжингенмен. Капельницалар салма, уколлар этме, давлениемни оьлчеме тюшсе, Махружатгъа кёп ёлугъаман яда оьзюн чакъыраман. Бу тиштайпаны: «Гьали болмайман, ишим кёп», дейген калималар къаркъарасына сингмеген, ол дестине гелип, аврувума рагьатлыкъ эте. Юртлулар да шулай талаплы, гьаракатчы, бажарывлу ва рагьмулу Махружатны ишине оьр къыймат бере, огъар алгъышлар эте.
Агьлюсю Имамутдин булан уьйленип, талайлы, халкъ сукъланардай ожакъ къургъан Махружатны эки де къызы уьйленген, бугюнлерде олар беш авлетни оьсдюре. Ата-ананы сююнчю, къуванчы – яшларыны яшлары, оланы савлугъу ва аминлиги. Юртлулар бу асил хасиятлы, даим аврувлагъа илиякълы багъагъаны саялы огъар: «Эмли къоллу Махружат» деп тюгюл айтмайлар, шу сатырлар да огъар тийишли деп эсибизге геле.
Гёз тиймесин эмли билеклеринге,
Савлукъ болса, эпге геле бары зат.
Пашман болмай, къайгъылагъа чомулмай,
Сюр оьмюрню талайлыкъда, Махружат!
Стахан Мутаев, загьматны ветераны, муаллим
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
