Ахырынчы зенг къагъылды

Оьтген сонгугюн, май айны 22-синде, анадаш районубузну ичиндеги бары да мактапларда Ахырынчы зенг къагъылыв байрамгъа багъышлангъан шатлы чаралар оьтгерилди. Шо чараланы барышында район администрацияны башчысы М.Амиралиев, район администрацияны жаваплы къуллукъчулары, районну ичиндеги юртланы гьакимбашлары ва олай да депутатлар, жамият чалышывчулар, муаллимлер ва яшланы ата-аналары оьзлени ортакъчылыгъын болдурдулар.

Къарабудагъгент гимназияда

Алдагъы гюн, май айны 22-синде, Къарабудагъгент школа-гимназияны алдындагъы майданчада Ахырынчы зенгге багъышланып шатлы мердеш оьтгерилди. Шо шатлыкъны ача туруп, гимназияны муаллимлери Умукюсюм Жамавова ва Бежев Муселемова жыйылгъан охувчуланы, оланы ата-аналарын, гелген къонакъланы Ахырынчы зенгге багъышлангъан шатлыкъ булан къутлады, бу йыл школаны тамамлайгъан охувчулагъа яхшы ёл ёрады. Россия Федерацияны гимни согъулгъан сонг, ортагъа ­чыкъгъан райондагъы яшланы яратывчулукъ уьюнде Рашит Ибрагьимовну ёлбашчылыгъы булан къурулгъан «Шатлыкъ» деген бийив ансамблини бир бёлюгюню ортакъчылары оьзлени къурч бийивлери булан охувчуланы шатлы байрамына уллу къошум этди. Сонг чыгъып сёйлеген гимназияны директору Адил Салаватов да йыл боюнда арымай-талмай яшлагъа билим беривде гьаракат этген муаллимлени, олай да бу охув йылда школаны тамамлайгъан охувчу яшланы атына лайыкълы сёзлер багъышлады.

Гьаманда йимик, охувчуланы шо шатлы байрамында ортакъчылыкъ эт­меге гелген районну ёлбашчысы Магь­мут Амиралиев де ­оьзюню къутлав сёзюн ­оьтген йылгъы коронавирус аврувну четимликлеринден шулай жыйылмагъа, байрам шатлыкълар оьтгермеге бажарылмагъаны гьакъда башлады.

Болса да, районну, республиканы, олай да савлай Россияны врачларыны гьаракаты булан шо авур аврувну бизде аз буса да енгме бажаргъанны эсгерди.

-Тек, шо загьру буссагьатда да бизде, Россияда оьмюр сюрегенни унутмагъа ярамай. Шо саялы да, биз, оьмюрге баргъан уллулар, вакцинадан баш къачырма тарыкъ тюгюлбюз. Шону этдирсек, биз айланабыздагъыланы да, яшларыбызны да савлугъун сакъламагъа болагъанны унутма тюшмей,-деди ол.

Школаны тамамлайгъан охувчулагъа буса ол ЕГЭ-лени, ОГЭ-лени оьр къыйматлагъа берип, оьр охув ожакъларда охувун узатып, халкъына, жамиятына пайдалы адамлар болуп оьсмекни ёрады. Ондан сонг сёз берилген районну жамият палатасыны ёлбашчысы Абдулгьамит Мамагишиев де бу йыл школа булан савболлашагъан охувчулагъа, 10-11 йыллар олагъа билим-тарбия берип юрюген муаллимлеге гележекде савлукъ булан узакъ оьмюрлер ёрады. Гимназиядагъы шатлыкъ охувчуланы чыгъышлары булан узакъ замангъа узатылды.