Савбол, Азбука!
Гиччипавлагъа илмуланы дюньясы азбука китапдан башлана. Биринчилей, гьарпланы, сёзлени уьйрене туруп, олар уллу китапланы охумагъа чыгъа.
Шолай, алдагъы гюн, апрель айны 24-нде, Манасгент орта школада шатлы чара оьтгерилди. Шо гюн 1-нчи «г» класны охувчу яшлары азбука китабы булан савболлашды.
Оьтгерилген чарада дарс береген муаллимлер, школаны ёлбашчысы Зюлфия Сайитова,яшланы аналары ортакъчылыгъын болдурдулар.
Чараны ача туруп, яшланы муаллими Апав Ражаповна бары да жыйылгъанлагъа оьзюню атындан яшланы байрам чарасына гелгени саялы баракалла билдирди.
Чараны барышында 1-нчи «г» класны охувчу къызлары ва уланлары азбукагъа багъышлангъан шиърулар охуду ва «Учат в школе» деген йырны йырлады. Шо гюн охувчу яшлар оьзлени бары да гьюнерлерин гёрсетмеге гьаракат этдилер.
Охувчу яшланы бир группасы шо гюн къужурлу гёрюнюшню сагьналашдырып, жыйылгъанланы разилигин къазанды.
Чарада чыгъып сёйлеген школаны ёлбашчысы Зюлфия Сайитова гиччипавлагъа яхшы охумакъны, билимли яшлар болмакъны ва гележекде де уллу оьрлюклеге етишмекни ёрады.
Яшланы аналары оьзлени атындан муаллими Апав Ражаповнагъа баракалла билдирди.
Олай да, азбуканы охуп битген яшлагъа дипломлар тапшурулду. Яшланы аналары олагъа китаплар ва татлиликлер савгъат этди.
Шо гюнгю байрам чара гиччипавланы эсинде кёп замангъа къалажакъ. Чараны ахырында яшланы муаллими гелген къонакълагъа баракалла билдирди.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
