Оператив штабны генгеши

«Бир йыл алда республикабызда коронавирус аврувдан аваруйгъанланы санаву лап да оьр даражада эди. Шоллукъда, бары да агьлюлеге шо аврув таъсир ва гюч этди, къайгъы гелтирди. Бу йыл буса май ва Ораза байрамларыбыз енгил оьтдю. Шо ишде къошумун болдургъан ДР-ни Муфтиятыны атына да баракалламны билдиремен», — деп башлады С. Меликов ­оьзюню сёйлевюн.

Ол оьзюню сёйлевюн узата туруп, 18-нчи майда медицина сестраланы халкъара гюню оьтгерилгенин айтды. Демек, республикабызда шо тармакъда загьмат тёгеген 18 минг 500 медсестраны байрам булан къутлагъан сонг, олагъа гьакъ юрекден разилигин билдирди.

Олай да, Сергей Меликов коронавирус аврув булан ябушувда ва алдын алывда бу йыл яхшы якъгъа алмашынывлар ва алгъа барывлар болмагъа имканлыкълар яратылгъанны эсгерди. Аслу гьалда ватандашлар гёнгюллю кюйде вакцин этдирмеге гереклигин ачыкъ этди. Шолай болса, аврувну яйылывуна тогъас салынажакъ.

«Май айны 17-сине бизин республикабызгъа вакцинни 101 минг оьлчевю (доза) етишдирилген. Шоланы 78 минги этилген, дагъы да 23 минг оьлчев колланмай тура. . Шо гьалны яхшылашдырмаса ярамай», – деп ол оьзюню сёзюн узатды.

Генгешни барышында Рос­потребнадзорну, республиканы савлукъ сакълав министерлигини ёлбашчылары ва оьзге жаваплы къллукъчулар коронавирус аврув булангъы бугюнгю гьалы гьакъда маълуматлар ва баянлыкълар берди.

Оператив штабны гезикли генгешини ахырында ДР-ни Башчысы замалыкъгъа борчларын кютеген Сергей Меликов ДР-ни Гьукуматына ва оьзге жаваплы къурумларына, далапчыланы вакиллерине гьалны ёрукълашдырмакъ учун чаралар гёрмеге тапшурду.